BILBO, 7 Dic. (EUROPA PRESS) -
Aiko taldeak Eguberrietako ohiko erromeria egingo du Durangoko Plateruena Kafe Antzokian larunbatean, abenduaren 10ean, arratsaldeko 17:00etatik aurrera. Halere, ospakizuna goizean hasiko da, musikari eta dantza maisuen taldeak hainbat ekitaldiren bitartez prestatu duten jardunaldi zabal batekin.
Eguberrietako dantza-bazkari tradizionala da "dantza egiteko berezko estilo tradizionala zabaltzen diharduen musikari eta dantza maisuen kolektibo honen oraingo proposamena", azaldu dute Aiko taldearen arduradunek.
Ospakizuna sokadantza batez hasiko da, 13:00etan, Durangoko Andra Mari elizako arkupean. Jarraian, bertaratutakoek kalejira bat egingo dute, musikaren doinuen arabera dantzatzeko aukera eta guzti, neguko bazkari erromeriak egoitzatzat erabili ohi duen Plateruena Kafe Antzokiraino. Jarraian, 14:30ean, txakolina banatuko da bertaratutakoen artean eta 15:00etan bazkari herrikoia egingo da.
Bazkalostean, Aiko Taldeak 17:00etatik aurrera egingo den erromeria alaituko du, eta 20:00etan Bizkaiko Gaiteroen txanda izango da. Eguna amaitzeko, Aiko taldea arduratuko da berriro ere musika jartzeaz, guateke tradizional bat alaitzeko asmoz. Ospakizuna 22:00etarako amaitzea aurreikusi da.
Ospakizuna dantzazale guztientzat zabalik egongo da, eta jada "garrantzi handiko topaketa bilakatu da euskal dantza herrikoien zaleentzat, bertan elkartzen baitira ikasitako trebetasunak erakusteko asmoz, herrietako erromeria tradizionalak gogorarazten dituen jardunaldi ezin dibertigarriago honen bitartez".
Plateruenan egingo den bazkarirako 20 euro ordaindu behar dira aurrez, eta horretarako, txartelak Plateruenan bertan eros daitezke edo bestela dirua sartu Kutxabankeko ES07 2095 0233 1091 1639 0934 kontu zenbakian (titularra Aiko Kultur Elkartea).
Urtea amaitzeko, Aiko taldeak beste hitzordu bi ditu: hilaren 17an, BANDtzaldia Niessen Kulturgunean Errenteriako Musika Bandarekin, eta 30ean urteko azken erromeria Derioko Baserri Antzokian.
