BILBO, 1 Mar. (EUROPA PRESS) -
AlhondigaBilbaok animazio, bideo-joko eta robotikari buruzko tailer bat antolatu du Aste Santuan 8 eta 12 urte bitarteko umeentzako, dibertitzeko eta, aldi berean, hezitzeko helburuarekin. Mediateka BBK-ko Txikiland gunean izango da ikastetxeetako oporretako bost eguneko bi txandetan: lehena martxoaren 25etatik 29ra eta bigarrena apirilaren 1etik 5era.
Tailerren ordutegia 11:00etatik 14:00etara izango da, eta izena emateko epea ostiral honetan hasi da Infopuntuan, plaza guztiak bete arte. Prezioa 20 eurokoa da (15 euro AlhondigaBilbao txartelarekin), zentro bilbotarreko iturriek jakinarazi dutenez.
Tailerra gazteek proiektu tekniko batean lehen pausoak emateko diseinatuta dago, robotikaren eremuan, hain zuzen ere, eta gaitasun hezigarri ezberdinak garatzeko aukera atsegin eta entretenigarria izango da.
Horretarako Lego WeDo tresna didaktikoa erabiliko dute. Lehen hizkuntzako azken mailetako ikasleentzat eredugarriak izan daitezkeen hainbat arlo lantzen ditu tresna horrek. Horrela, parte-hartzaileek makina eta animalien ereduak eraikiko dituzte; ekintzak eta portaerak programatuko dituzte, distantziak zentimetrotan eta abiadura errotazioetan neurtzen ikasiko dute; makinak nola funtzionatzen duten landuko dute eta, horrekin batera, istorioak sortuko dituzte.
Modu honetan, tailerrean askotariiko gaiak lantzeko aukera izango dute haur eta gazteek, hala nola zientzia, teknologia, matematikak, eta lengoaia, irakurmena eta idazkera.
HAUR ETA GAZTE LITERATURA EGUNA
Bestalde, apirilaren 2an Nazioarteko Haur eta Gazte Literatura Eguna ospatzen da, eta ildo horretan, AlhondigaBilbaok mugimendua, musika eta akrobazia biltzen dituen ikuskizun bat antolatu du Atarian: "Hemen hasten da istorioa". Obra horretan, mugimendua, musika eta akrobazia "hitz bihurtuko dira publikoarekin istoriak partekatu ahal izateko".
Ikuskizunean zehar pertsonaiek "beren zentzumen guztiekin bizi dituzte liburuak", eta modu horretan "hezurmamitzen dituzte beren barneko hitzak". Tronboia, biola, loop machine eta liburuek mugimenduak eta istorioa laguntzen dituzte. Bi saio izango dira, 12:30ean eta 18:00etan, eta publiko guztiarentzat da.
