GASTEIZ, 4 (EUROPA PRESS)
Arabako Pintxoaren II. Aste Nagusia irailaren 9tik 20ra bitartean egingo da, SEA Ostalaritzak antolaturik eta Gasteizko Udalaren, Arabako Foru Aldundiaren, Basketou Turismoaren Euskal Agentziaren eta Euskadi Gastronomikaren laguntzarekin. 34 establezimenduk eta 66 pintxok -Gasteiz, Guardia, Kexaa eta Murgiakoak- hartuko dute parte lehiaketan, Arabako pintxorik onena aukeratzeko.
Irabazten duen ostalaritza establezimenduak zuzenean Euskal Herriko Pintxo Txapelketara joateko txartela lortuko du, Arabako sukaldarien ordezkari bezala; datorren urrian izango da hori, Gasteizko Udaleko iturriek jakinarazi dutenez.
Aurtengo edizioaren berritasun nagusia gastronomiaren eta magiaren uztarketa da, Arabako Pintxoaren II. Aste Nagusiak eta Magialdia XXVII. Nazioarteko Magia Jaialdiak -irailaren 14tik 20ra- egun batzuetan bat egiten dutenez, bi ekitaldien antolatzaileek zenbait jarduera prestatu baitituzte elkarrekin, bi gertaeren sustapena eta zabalkundea indartzeko asmoz.
"Eskaintza gastronomikoa kultura eskaintzarekin eta hiriko ekitaldi handiekin lotzea ostalaritza jarduera dinamizatzeko eta Gasteizek turismoa erakartzeko duen ahalmena sustatzeko modua da. Egun hauetan, hiriko taberna eta jatetxeek menu bereziak prestatu dituzte FesTValerako, eta Magialdian ere pintxoak eta magia bateratzeko aukera izango dugu, Pintxoaren Aste Nagusiaren barruan. Honelako sinergien aldeko apustua egiten jarraitu nahi dugu", azaldu du Enplegu eta Garapen Ekonomiko Iraunkorraren zinegotzi Nerea Melgosak.
Parte hartzen duten hamar establezimenduk zuzeneko magia emanaldiak eskainiko dituzte. Magia jaialdiarekiko lankidetzak beste berritasun bat ekarri du edizio honetan: "Magialdia pintxoa" kategoria berria. 12 jatetxe eta taberna lehiatuko dira, eta guztira 16 pintxo mota prestatuko dituzte beren barretara hurbiltzen diren bezeroak harritzeko asmoz.
FINALA, IRAILAREN 24AN
Final handia irailaren 24rako antolatu du SEA Ostalaritzak, Aste Nagusian bukatzean epaimahai profesionalak -gastronomo ospetsuek osatua- aukeratutako zortzi pintxoen artean. Aukeratutakoek epaimahaiaren aurrean egingo dituzte pintxoak. Urrezko Pintxoa -Euskal Herriko Txapelketan Arabako ordezkaria izango dena-, Zilarrezkoa, Brontzezkoa eta Magialdia Pintxoa sariak banatuko dituzte.
Orobat, Arabako Pintxoaren Aste Nagusian zehar, nahi duenak SMS bidez botoa eman dezake gustukoen izan duen mokaduaren alde, eta hori kontuan izanik Pintxo Herrikoia aukeratuko da. Parte hartzeak badu beste pizgarri bat, bi pertsonarentzako Teneriferako bidaia bat zozketatuko baita boto emaileen artean. Zozketa notarioaren aurrean egingo da, eta emaitza irailaren 24an bertan ezagutaraziko da.
Gastronomia ekitaldi horren bidez, SEA Ostalaritzak sektorea eta haien produktuak publikoaren artean ezagutarazten eta zabaltzen laguntzen du, barrako ostalaritza girotu eta dinamizatzen du, eta Arabako establezimenduetan eskaintzen den sukaldaritza mota horren kalitatea hobetzen du.
Horrekin lotuta, establezimenduek egindako ahalegina azpimarratu nahi izan dute antolatzaileek, lehiaketara aurkeztutako 66 pintxoek jauzi kualitatiboa eman baitute aurreko edizioaren aldean, bai itxurari bai sorkuntzari dagokienez.
