BILBO, 4 (EUROPA PRESS)
Zineuskadi plataformak sustatzen duen Zinema Euskaraz programari esker, "Ardiak eta otsoak" film errusiarra euskaraz estreinatuko da zinema aretoetan ostiralean, maiatzaren 5ean. Hain zuzen, Bilbon (Multicines), Getxon (zinema), Durangon (Zugaza), Errenterian (Niessen), Donostian (Antiguo Berri), Eibarren (Coliseo) eta Gasteizen (Florida) estreinatuko da euskaraz filma.
Halaber, aurki, Zumarragan (Zelai Arizti), Beasainen, (Usurbe), Galdakaon (Torrezabal), Mungian (Torrebillela), Derion (Gurea), Azkoitin (Baztartxo), Azpeitin (Soreasu) eta Muskizen (Meatzari) ere euskaraz ikusi ahalko da "Ardiak eta otsoak", Zineuskadik jakinarazi duenez.
"Ardiak eta otsoak" urruneko lurralde magiko bateko otsoen kanpalekuan kokatzen da. Otso taldeko buru izateko bi otsoren arteko borroka kontatzen du: alde batetik, Ragaer anker eta indartsua, eta bestetik, hari aurre egiten saiatuko den Gris izenekoa.
Borrokaz haratago, maitasun eta magia kontuak tartekatzen dira istorioan zehar; adibidez, zer gertatuko litzateke otso bat bere kobazuloan dagoela ardi bihurtuko balitz? Erantzunak "Ardiak eta otsoak" pelikulan aurkituko dira.
