GASTEIZ, 15 Mar. (EUROPA PRESS) -
Artium Arte Garaikidearen Euskal Zentro-Museoak familiartean egiteko performance-lantegi bat proposatzen du datorren larunbaterako, hilak 17, FamiliArtium programaren barruan, Gasteizko museoak ohar baten bidez jakinarazi duenez. Azucena Monge eta Idoia Elorza hezitzaileak izango dira gidariak eta 'ekintza artistiko' bat osatzen duten hiru elementuen inguruan lan egingo dute parte-hartzaileek, hots, gorputzaren, espazioaren eta denboraren inguruan.
'Gorputza, espazioa, denbora' lantegia familia osoak elkarrekin gozatzeko eta performancea --diziplina artistiko garaikideenetako bat-- ezagutzeko pentsatuta dago. Hain zuzen, museoak dioenez, joan den mendearen 1960ko hamarkadan abangoardiekin batera jaio ziren Joseph Beuys, George Maciunas, Marina Abramovic edota Carolee Schneemann artistek bultzada garrantzitsua eman zioten, eta harrezkero sortzaile-belaunaldi askoren jardun artistikoaren parte izan da hurrenez hurren.
Azucena Mongek eta Idoia Elorzak emango dute lantegia eta familia parte-hartzaileekin batera "esperientzia performatibo bat osatzen duten hiru tresnak" konbinatuko dituzte: gorputza, elementu nagusia, espazioa eta denbora, gorputza mugitzen den bi dimentsioak. Asmoa ez da antzezpen bat egitea, baizik eta errealitate bat aurkeztu eta ohiz kanpoko esperientzia bat familiartean bizitzea.
FamiliArtium, performance hau hartzen duena, familiartean egiteko lantegi-programa bat da, Artiumek sortua, "kultura garaikidearekin lotutako gai ugariak jorratzen dituena, haurrek eta helduek jolastuz eta sortuz disfrutatzeko", azaltzen du erakundeak. Bi orduko iraupena izaten du eta jarduera doakoa da. Hala ere beharrezkoa da erreserba egitea 945 20 90 20 telefonora deituz.
