BILBO, 15 Sep. (EUROPA PRESS) -
Iñaki Ugarteburu sariak banatu ditu gaur Azkue Fundazioak Bilboko Rekalde aretoan, euskarazko Wikipediara egindako ekarpen onenen artean, Josune Ariztondo Bizkaiko Foru Aldundiko Kultura diputatu eta Azkue Fundazioko presidentea buru izan duen ekitaldian.
Iñaki Ugarteburu sariak izen bereko Euskal Herriko Unibertsitateko (EHU) Medikuntzako irakaslearen omenez antolatu ziren, sarera eta euskarazko Wikipediara arlo horri euskaraz egindako ekarpenak nabarmentzeko. Iñaki Ugarteburu, osagilea eta filologoa ikasketaz, euskalgintzan lan asko egindakoa zen, batez ere unibertsitate mailako euskarazko irakaskuntza bultzatzen.
Lehiaketa bost arlo ezberdineko ikasleei zuzenduta egon da: Natur Zientziak, Osasun Zientziak, Gizarte Zientziak, Giza Zientziak eta Teknika eta Teknologia. Ekimena euskarazko Wikipedia sustatzeko antolatu zen pasa den martxoan. Ikasleei bere lan eta artikuluak euskarazko Wikipedian sartzeko gonbidapena luzatu zitzaien, hamar lanik onenak sarituak izango zirelarik, bi sari kategoria bakoitzeko.
Sarituak aukeratzeko, balorazio batzordeak zenbait irizpide izan ditu kontuan, hala nola lanaren edukia, euskararen txukuntasuna eta multimedia-baliabideen erabilera, bideoak edo argazkiak, esaterako. Sareratu diren bost lanik onenei ordenagailu eramangarri bana eman zaie.
Balorazio batzordeak aurkezturiko lanen kalitatea eta originaltasuna nabarmendu du. Osasun Zientzietan, Iñigo Romero izan da irabazlea "Barne belarri" artikuluarekin; Natur Zientzietan, Adrian Hugo Llorente, "Antropologia Fisikoa" artikuluarekin; Gizarte Zientzietan, Aitor Gorrotxategi, "AMIA Analisi" artikuluarekin; eta Teknika eta Teknologian, Jon del Olmo, "Kontrol lausoko sistema" artikuluarekin.
Iñaki Ugarteburu saria antolatu duten erakundeen ordezkariek banatu dituzte sariak, hots, Josune Ariztondok berak, foru erakundeko Euskara Sustatzeko zuzendari nagusi Miren Dobaranek, Bilboko Udaleko Euskara, Gazteria eta Kirol Saileko zinegotzi Sabin Anuzitak, EHUko Euskara eta Eleaniztasuneko errektoreorde Gidor Bilbaok, Deustuko Unibertsitateko Hizkuntz Politikako zuzendari Joxin Etxezarreta, Euskaltzaindiako presidente Andres Urrutia eta Azkue Fundazioko zuzendari Rodrigo Gartziak.
Ekitaldia Josune Ariztondoren hitzekin bukatu da. Ariztondok euskarazko Wikipediak egun dituen edukiak eta jakintza librearen garrantzia azpimarratu ditu. Sarien deialdia maiatzan bukatu zen, baina irailaren 17an Software Askearen Eguna ospatzen da eta egitasmo honekin bat etortzeko ekitaldi hau data honetan burutzea erabaki zen.
