GASTEIZ, 14 Feb. (EUROPA PRESS) -
Eusko Legebiltzarraren osoko bilkurak aurreko legealdian martxan egon zen Bake eta Elkarbizitzari buruzko Lantaldea berriro abian jartzea onartu du ostegun honetan, EAJren eta PSE-EEre babesarekin. EH Bildu abstenitu egin da eta PP eta UPyD alderdiek kontra bozkatu dute.
Aurreko legealdian gertatu zen moduan, polemikaz beterik egon da lantalde hau abiarazteko prozesua. 2012ko urriko hauteskundeen ondoren batzordea berriro martxan jartzea proposatu zuen PSE-EEk bozketa aste batzuk atzeratzea eskatu zuen, alderdiak ez zeudelako ados lantaldea martxan jartzeko formularen inguruan.
EH Bilduk ez du nahi lantaldeak joan den legealdian egin ziren lanak oinarritzat hartzea. Oroimen "kolektiboan eta ez neutralean" oinarrituriko bakearen aldeko testu bat onartu zen aurreko legealdian, eta "bakoitzaren erantzukizuna" zehaztearen alde egin zuen.
Bestalde, PPren arabera, lantaldean parte hartu nahi badu, koalizio abertzaleak ETA gaitzetsi behar du lehenik, eta UPyD-k ez du parte hartu nahi, "ETAren agenda onartzea" ekartzen duelako.
Azkenik, EAJk eta PSE-EEk aurrekoaren "lanekin jarraituko duen" Bake eta Elkarbizitza Lantaldea sortzea planteatzen duen proposamen bat adostu dute. Testua ostegun honetan onartu da, jeltzaleen eta sozialisten aldeko botoarekin, EH Bilduren abstentzioarekin eta PP eta UPyDren kontrako bozekin.
