DONOSTIA, 19 (EUROPA PRESS)
Basque Culinary Action! Ekintzaileen Nazioarteko Foroaren laugarren edizioa otsailaren 6an eta 7an egingo da, Basque Culinary Centerren (BCC), eta ardatza elikaduraren iragana, oraina eta etorkizuna izango da. Alderdirik tradizional eta, aldi berean, garaikideenei helduko zaie sektoreko ekoizpena eta industrializazioa aipatuz.
Aldi berean, gastronomia zerbitzuak ematea, janariaren digitalizazioa eta antzeko gaiak ere landuko dira. Nekazaritza, elikagaigintza eta gastronomiaren sektorearen ikuspegi global eta diziplina arteko batetik hainbat nazionalitatetako ekintzaileek azaldutako kasu arrakastatsuak ezagutzea da xedea.
Basque Culinary Action! ekimenean bildutako foroaren helburua, negozioak abian jarri dituzten ekintzaileen esperientzia praktikoak eta estrategiak partekatzea da. Horretarako, protagonistak munduko hamaika txokotatik helduko dira, euren bizipenak bertatik bertara kontatzeko, antolakuntzak jakinarazi duenez.
2014ko otsailean, Basque Culinary Centerrek CA! Ekintzaileen Nazioarteko I. Foroa antolatu zuen. Ekimen horrek Heineken, Hazi eta Donostiako Sustapenaren laguntza zuen, eta helburua zen nekazaritza, elikagaigintza eta gastronomia ulertzea sektore hori enpresari bezala mugitzen duten eragileen bidez.
Aurten izango diren hizlarien artean daude, besteak beste, JP McMahon Eat Galway markako hiru jatetxeren jabea, sukaldaria eta hezitzailea; Elena Reygadas chef mexikarra, 2013ko Latinoamerikako emakumezko chef onenaren Veuve Clicquot sariaren irabazlea; Christian Puglisi, Kopenhagen bizi den chef italiarra, munduko jatetxerik jasangarrienaren saria bi aldiz irabazi duena eta ekintzailetza jasangarriaren erreferentea dena; Tomas Larrañaga, Maje Gorritxo emaztearekin batera Euskadin ekoizpen ekologikoaren aitzindaria dena, Biolurren bidez; Emilio Sepulveda, Natural Machinesen sortzailea; Alejandro del Castillo eta Nono Tore, Internet bidez fruta saltzeko Exotic Fruit Box plataformaren sortzaileak; Alejandro Lorenzo, eltenedor.es webgunearen sortzailea.
Askotariko profilak dituzten hizlariak elkartuta, Culinary Action! Ekintzaileen Nazioarteko IV. Foroak sektorearen egungo egoera aztertuko du, diziplina arteko ikuspegi batetik eta, zehazkiago, negozio eredu berriak identifikatuko ditu.
TAILERRAK ETA DINAMIKA
Hitzaldiez gain, foroan talde txikientzako tailerrak eta dinamikak ere izango dira, negozioaren zenbait alderdiri buruzkoak. Izena ematerakoan, parte hartzaile bakoitzak sei gairen artean bat aukeratu beharko du: produktuen diseinua egungo joeren arabera, finantzaketa, komunikazioa, ospe digitala, familia enpresen kudeaketa eta negozio batean gora egiteko gakoak.
Horrez gain, foroa profesionalen arteko konexioak sortzeko eremua ere bada, eta sektoreko ekintzaileak animatzeko merkatua "astintzea" da bere helburuetako bat. "Ekintzailetza helburu duen bokazio bat sustatu nahi dugu, jendea inspiratu eta giroaz kutsatzeko eremu bat sortuz baina, batik bat, horiek aktibatzeko asmoarekin. Culinary Action! Foro honetan ekiteko gogoa eta ideia onak dituzten pertsonek testigantza erabilgarriak eta tresna zehatzak lortzea nahi dugu, beren proiektuak arrakastaz garatzeko gauza izan daitezen", azaldu du Joxe Mari Aizega Basque Culinary Centerreko zuzendari nagusiak.
Gainera, foroaren laugarren edizioan, Basque Culinary Centerrek Culinary Action! ekimenaren alde egindako apustua berretsi nahi du. Espainiako ekintzailetzaren aldeko proiektu hori indartzeko ekimenak ugari sustatu dira: inkubagailu bat, CA! Startup Prizes sariak, Culinary Action! Ekintzailearentzako saria (aurten lehen aldiz), edo Espainiako hainbat hiritan antolatzen diren tailerrak, ekintzaile gastronomikoen partaidetzarekin.
