DONOSTIA, 25 Nov. (EUROPA PRESS) -
Berdinsareak antolatzen duen Beldur Barik! lehiaketaren bigarren edizioa "oso arrakastatsua" izan da, eta parte-hartzeari dagokionez errekorra lortu da, Euskadiko udalerri guztietako neska-mutil gazteek 250 lan aurkeztu baitituzte. Bada, arrakasta horren ondoren, bihar, azaroaren 26an, "Beldur Barik Topaketa 2011" jaialdia ospatuko da Donostian. Jai-giroko topaketak kolektibo ezberdinen esperientziak ezagutzea ahalbidetuko die neska gazteei eta berdintasunaren alde garatzen ari diren ekimenak zabaltzeko plataforma gisa balioko du.
Antolatzaileek adierazi dutenez, Topaketa 2011 Emakumeen Etxean eta Kursaal Zentroan egingo da. Goizean, 11:15ean, ongietorria, gosaria eta bisita gidatua egingo dira, eta 12:00etatik 14:00etara aldi bereko tailerrak egingo dira: "Autodefentsa feminista, gure aldarria eta jarduna" (neskentzat soilik, Kursaalen), "Feminista naiz eta harro nago!!!" (neskentzat soilik) eta "Txapa-tailerra" (mistoa).
Arratsaldeko 14:00etan self-service bazkari feminista izango da, eta 15:30etik 16:30era De espaldas al Patriarcado kantautore madrildar gaztearen emanaldia. Ondoren, 16:30etik 18:30era aldi bereko tailer gehiago egingo dira: "Ekintza Zuzena Feminista" (neskentzat soilik), "Ligatzen duzunean, ez zaitez liatu" (mistoa) eta "Riots not diets: emakumeak eta musika, DJ tailerra" (neskentzat soilik).
Gainera, 19:00etatik 20:00etara, kalejira bat egingo da Ondarroa, Ermua, Basauri, Mamiki, Gasteiz eta Durangoko emakume bandekin. Ibilbidea Emakumeen Etxean hasi eta Kursaal Zentroan bukatuko da. Ondorengo jarduera guztiak, Kursaalen bertan egingo dira, hau da, Beldur Barik! lehiaketako sari-banaketa, De espaldas al Patriarcado kantautorearen kontzertua eta Placida Ye-Ye DJak. Azkenik, 22:30ean itzulerako autobusa irtengo dira Kursaaletik.
Egun osoan zehar Beldur Barik Lehiaketako espazioa izango da, lehiaketara aurkeztutako lan guztiak ikusteko, eta Truke Gune Feminista ere antolatu da, kolektibo feminista desberdinen arteko topagunea, alegia.
