BILBAO, 2 Sep. (EUROPA PRESS) -
Benicio del Torok 62. Donostia Zinemaldiko bigarren Donostia Saria jasoko du eta 'Escobar: Paradise Lost' filma aurkeztuko du, Perlak Sailari amaiera emango dion lana, jaialdiko antolatzaileek asteartean jakinarazi dutenez.
Benicio del Torok Donostian pelikula aurkezten eta bere ibilbide osoaren aitormenezko Donostia saria jasotzen izango dela baieztatu du. Josh Hutcherson eta Carlos Bardem protagonistak, baita Andrea di Stefano idazle eta zuzendaria ere, Zinemaldian izango dira.
'Escobar: Paradise Lost' pelikulako protagonista Nick (Josh Hutcherson) da, Kolonbiara anaia bisitatzera joatean bere amets guztiak betetzat joko dituen surflari gazte bat. Urmael urdinak eta hondartza zuriak hondo idiliko gisa dituela, María (Claudia Traisac) izeneko kolonbiar eder batez zeharo maiteminduko da Nick. Dena ezin hobeto doakiola dirudi, neskaren osaba ezagutzen duen arte: Pablo Escobar (Benicio del Toro) delako bat.
Donostia Sariaren irabazleari dagokionez, Benicio del Torok kritikarien gorazarrea eta hainbat sari lortu ditu bere ibilbidean. Ameriketako Estatu Batuetako Zinema Akademiak antzeztaldeko aktore onenaren Oscar saria eman zion, Steven Soderberghen 'Traffic' pelikulagatik eta Alejandro González Iñárrituren '21 Grams' ('21 gramo') filmean egindako lanagatik Oscar sarietarako izendatu zuen.
Aurrerago, Soderberghekin berriro lan egin zuen, Che Guevarari buruzko 'Che' film biografikoko protagonista gisa. Bere interpretazioagatik 2008ko Cannesko zinema-jaialdiaren bukaerako ekitaldian gizonezko aktore onenaren Urrezko Palmorria jaso zuen, eta hurrengo urtean, gizonezko aktore onenaren Goya saria.
Del Toro Joe Johnstonen 'The Wolfman' filmeko protagonistetako bat izan zen, Emily Blunt eta Anthony Hopkinsekin batera, eta Oliver Stonen 'Savages' filmean Lado pertsonaia nagusiaren rola jokatu zuen. Horrez gain, 'Jimmy P.' filmean Jimmy-ren rola jokatu zuen, 2013ko Canneseko zinema-jaialdian eman zuten filman.
Pantailan, azkenekoz, Walt Disney Pictures eta Marvel etxeen zientzia-fikziozko akziozko 'Guardians of the Galaxy' pelikulan agertu da, 2014ko abuztuan. 'Escobar: Paradise Lost' filmean Pablo Escobarren rola jokatzen du; datorren urtean, berriz, Mambrú izango da, Fernando León-en 'A Perfect Day' filmean, eta Sauncho Smilax, Paul Thomas Andersonek zuzendutako 'Inherent Vice'-n. Orain, Denis Villeneuveren 'Sicario' lana filmatzen ari da.
Del Torok, aurretik, honako film hauetan lan egin du: Frank Millerren 'Sin City' komikiaren egokitzapenean (Robert Rodriguezek zuzendua); Peter Weirren 'Fearless'-en, George Huangen 'Swimming with Sharks'-en, Abel Ferrararen 'The Funeral'-en, Guy Ritchieren 'Snatch'-en, Sean Pennen 'The Indian Runner' eta 'The Pledge'-n, Christopher McQuarrieren 'The Way of the Gun'-en, William Friedkinen 'The Hunted'-en, Susanne Bierren 'Things We Lost in the Fire'-n eta Terry Gilliamen 'Fear and Loathing in Las Vegas' filmean, Gonzo doktorearen rolean.
LEHENENGO PELIKULA, JAMES BONDEKIN BATERA
Bere lehenengo pelikula John Glenen 'License to Kill' izan zen (Timothy Dalton aktoreak bete zuen James Bonden rola), eta orduz geroztik bere antzezpen-lana kritikarien artean txalotua izan da.
Steven Soderberghen 'Traffic' pelikulagatik antzeztaldeko aktore onenaren Oscar saria lortzeaz gain, Urrezko Globoa, Zinemako Aktoreen Sindikatuaren Saria, BAFTA saria eta Berlingo nazioarteko zinema-jaialdiko Zilarrezko Hartza irabazi zituen. Halaber, New Yorkeko Zinema Kritikarien Taldearen, Zinema Kritikarien Elkarte Nazionalaren eta Chicagoko Zinema Kritikarien Elkartearen aipamenak jaso zituen.
Bestalde, '21 Grams' pelikulan egindako lanarekin 2003ko Veneziako nazioarteko zinema-jaialdian gizonezko aktore onenaren Ikusleen Saria irabazi zuen. Bryan Singerren 'The Usual Suspects' filmeko Fred Fenster pertsonaiaren antzezpenagatik eta Julian Schnabelen 'Basquiat' filmeko Benny Dalmau pertsonaiaren antzezpenagatik Independent Spirit sari bana irabazi zituen.
Del Toro Puerto Ricon jaio, eta Pennsylvanian hazi zen. Kaliforniako Unibertsitatera joan zen (San Diego), eta han, ikasleek sortutako lan askotan aritu zen. Horietako bati esker, New Yorkeko Lafayette antzokiko antzerki-jaialdi batean parte hartu zuen. Stella Adler kontserbatorioan ikasi zuen, Arthur Mendoza tutore zuela.
Aurten, beste Donostia Sari bat emango du Zinemaldiak, Denzel Washington aktore estatubatuarrari, hain zuzen ere. Honek, 'The Equalizer' filma aurkeztuko du Gipuzkoako hiriburuan irailaren 19an.
