BILBO, 19 Ene. (EUROPA PRESS) -
Bizkaiko Foru Aldundiak eta Trapagarango Udalak lankidetza hitzarmen bat sinatu dute hirugarren adinekoentzako egoitza bat eraikitzeko herri bizkaitarrean. Hitzarmen honetan lankidetza harremanak ezarriko dira foru errakundeko Gizarte Ekintza Sailaren eta Trapagarango Udalaren artean, menpeko adineko pertsonentzako egoitza bat eraiki eta ustiatzeko.
Egoitza eraikitzeko argi berdea ematen duen hitzarmena sinatu ondoren, Trapagarango Udalaren aldetik eman beharreko hurrengo urratsa da xehetasun-azterketa aurkeztea, eraikinaren ordenazio bolumetrikoa eta haren inguruaren urbanizazioaren proposamena zehaztuko duena. Udalak dagoeneko jaso du azterketa hori eta Lurren Kutsaduraren azterketa ere abian jarri du, eraikuntzari ekin aurretik lurzoruak deskontaminatu beharko balira ere.
Eraikiko den egoitzak 2.952,71 metro karratuko azalera hartuko du, eta El Barraco izenaz ezagutzen den inguruan kokatuko da. 120 pertsonentzako lekua izango du. Egoitzaren funtzionamendu, mantenimendu eta garbiketari dagozkion gastuak eta hura artatzeko eta materialak berrezartzeko gastuak Bizkaiko Foru Aldundiak zerbitzu horiek kudeatzeko esleituko duen erakundearen kontura joango dira.
