BILBO, 7 (EUROPA PRESS)
Bizkaiko Foru Aldundiko Bizkaikoa sareko lau museok (Euskal Herria Museoa, La Encartada fabrika-museoa, Arrantzaleen Museoa eta Arkeologi Museoa) jarduera bereziak antolatu dituzte beren programazioaren barruan, martxoaren 8ko Emakumearen Nazioarteko Eguna dela eta.
Horrela, foru erakundeak jakinarazi duenez, asteartean, martxoaren 8an, Gernikako Euskal Herria Museoak "Las pelotaris" filma eskainiko du 18:30ean, euskal pilotan jokatzen duten Maite, Alicia, Rosa, Marion, Esther eta beste hainbat emakumeri buruzko pelikula dokumentala. Mundu mailako txapelketak eta dominak irabazi dituzte eta beren garaipenak ez dira nabarmentzen. Filma "baikortasunaren, hobetzeko nahiaren eta paradoxen istorio bat" da. Sarrera doakoa izango da.
Halaber, asteartean bertan, Bermeoko Arratzaleen Museoan "Gure lehengo andran gora beherak - Bermeanas" erakusketa egongo da. Argazki erakusketa horretan, Bermeoko emakumeak eguneroko egoera desberdinetan ikus daitezke. XIX. mende amaierako eta XX. mendeko irudiak dira.
Bestalde, Balmasedako La Encartada fabrika museoak emakumeen hilabetea antolatu du martxoan zehar. Ildo horretan, asteartetik ostiralera bitartean, egunero eguerdiko 12:00etan, "Gizonezkoaren lanak-emakumezkoaren lanak" bisita tematikoa eskainiko du (erreserba egin behar da). Bestalde, astelehenetik ostiralera, "Berdintasunean hezi" eskola jarduera egingo da 10 eta 14 urte bitarteko neska-mutilentzat. Jarduerak ordubete irauten du eta 10:00etatik 13:00etara aukeratu ahal da zein ordutan egin nahi den. Prezioa euro bat da ume bakoitzeko (irakasleak doan).
Azkenik, Bilboko Arkeologia Museoak (Bilbo), "Apain-mahaiko Istorioak" aldi baterako erakusketaren barruan "Emakumeak eta Jainkosak: Edertasunaren distira" bisita gidatua eskainiko du 18:00etan, Ainara Martinez doktorearen eskutik. Asteartetik igandera bitartean, areto desberdinetatik ibilbide berezia egitera gonbidatuko du jendea, betaurreko "lilak" jarrita berdintasunaren alde.
"Ibilbide libre horren helburua da obra hautatu batzuek gogoeta eragitea, hain zuzen ere, gertaera historikoez hitz egitean burura datozkigun eraikuntzei buruz; horrela, historia genero ikuspegitik ulertzeko gai izango gara", azaldu dute.
