BILBO, 14 Ene. (EUROPA PRESS) -
Otsailaren 15ean iritsiko da zinema-aretoetara "Blackie & Kanuto" Baleuko estudio bizkaitarraren animaziozko film luze berria. Frantziako Art Mell eta Italiako Lumiq estudioekin batera ekoiztutako lana da, eta Barton Films du banatzaile. Familia osoarentzako filma euskaraz eta gaztelaniaz estreinatuko da aldi berean, 3D eta 2D formatuetan.
Filmaren arduradunek jakinarazi dutenez, Blackie ardi beltza eta Kanuto artzain-txakurra dira abenturazko komedia dibertigarri honen protagonistak. Ilargira joatea da Blackieren obsesioa, eta Blackie bera da Kanutoren obsesioa. Bidaian abiatuko dira biak, eta bidean opera abesten duten behiak, otso adeitsuak, paperik gabeko etorkin diren armiarmak eta aireratzeko prest den kohetea duen txakur taldetxo bitxia aurkituko dituzte. Halere, Pinky arrosa koloreko ardi itzel eta zitalak, euren asmoa galaraziko du.
Francis Nielsen-ek zuzendu du "Blackie & Kanuto" filma. Asterixen egile René Goscinnyk eta Albert Uderzok sortutako Idefix estudioan zaildu zen zuzendaria bere ikus-entzunezko ibilbidearen hasieran. Gaur egun telesailak eta film luzeak zuzentzen ditu, eta 2003an Veneziako Mostraren sail ofizialean lehiatu den historiako lehen animaziozko zuzendaria izan zen, "Le chien, le general et les oiseaux" lanarekin.
Ivan Oneka arduratu da zuzendaritza artistikoaz. Oneka Baleukoko zuzendari artistikoa izan da 12 urtez, eta 11 film luze baino gehiagotako pertsonaiak eta eszenatokiak sortu ditu. Bestalde, 80 soinu-banda baino gehiagoren egilea den Xavier Berthelot-ena da musika, eta gidoia Angel E. Parienterena.
Baleuko ikus-entzunezko enpresa 1993an sortu zen eta Durangon (Bizkaia) du egoitza. Animaziozko 11 film luze ekoiztu ditu, horien artean berriki Goya sarietarako hautatu duten "The Wish Fish" edota "Betizu eta urrezko zintzarria", 2008an hautatu zutena. Era berean, fikziozko hiru film luze ekoiztu ditu, azkena Barbara Goenaga protagonista duen "Izarren argia" (2010). Dokumental eta hainbat formatutako telebista-saio ugari ere ekoiztu ditu.
