DONOSTIA, 24 (EUROPA PRESS)
Azpeitian (Gipuzkoa) dagoen Burdinbidearen Euskal Museoak lurrunezko lau tren zirkulazioan jarriko ditu asteburu honetan. Zehazki, trenak Azpeititik Lasaora ibiliko dira, 12:30ean ostiralean, uztailaren 25ean, 12:30ean eta 18:00etan larunbatean, uztailaren 26an, eta 12:30ean igandean, uztailaren 27an.
Museoko arduradunek jakinarazi dutenez, gainera, "Trevor Rowe Euskadin" erakusketa ikusgai dago oraindik. Erakusketa maiatzaren 18an zabaldu zen, eta Trevor Rowe britainiarren 32 argazkirik hoberenak biltzen ditu. Burdinbidearen Euskal Museoak duela gutxi erosi du bilduma.
Balio handiko argazki historikoak dira Trevor Rowek 1952 eta 1968 artean iberiar penintsulan egindakoak. Denis Trevor Rowe trenbide zalerik aipagarrienetariko bat eta Britainia Handiko tren argazkilaria da. Trenbideari dion pasioak planeta erditik zehar ibiltzera eraman du antzinako lurrunezko tren makinak, bide estuko trenik berezienak eta antzinako tranbiak betiere bilatzen.
Bere bidaien emaitza zenbait argitalpenetan gauzatu da, hala nola 'European narrow gauge steam', 'Railway holidays in Spain', 'Railways of South America', 'Narrow gauge railways of Spain' edo 'Spain & Portugal railways'.
Bestalde, Burdinbidearen Euskal Museoak Europako tren bilduma hoberenetariko bat dauka, mota askotako ibilgailuekin: lurrunezko, diesel eta elektriko tren-makinak; automotoreak eta bagoi mota desberdinak.
Horrez gain, Euskadiko makina tresna multzorik osatuena eskaintzen du, Urolako Trenbidearen antzinako tailer mekanikoaren bidez. Halaber, XIX. mende bukaeratik trenbidean erabilitako uniformeen erakusketa dago, bai eta munduko trenbide erlojuen bildumarik hoberenetarikoa ere.
