BILBAO, 19 Ago. (EUROPA PRESS) -
Dj Jazzy Jeff, We are standard eta Klaxons musikariek kontzertuak eskainiko dituzte Guggenheim Bilbao Museoan, Saskibaloiko Munduko Txapelketaren ospakizunarekin batera. Saio guztiak 21:00etan hasiko dira, eta sarrera 20:00etan irekiko da.
Bizkaiko hiriburuko Udalak asteartean jakinarazi duenez, Guggenheim Bilbao Museoko zabaldegia aukeratu dute FIBA 2014 Saskibaloiko Munduko Txapelketarako programatutako doako kontzertuak emateko. Abuztuaren 29an, txapelketaren hasieraren bezperan, hitzordua Dj Jazzy Jeff-ekin da. Hip hop-aren aitzindarietako bat da, eta hiru Grammy, hiru American Music Award, bi NAACP (Erakunde Nazionala Kolorezko Pertsonen Aurrerapenerako), bi Soul Train Music Award eta MTV musika sari bat irabazi ditu.
DJ honen ibilbidea Will Smith aktorearen ibilbideari lotuta dago, duoa eratu baitzuten. Izan ere, raparen industriako lehenengo Grammy-a irabazi zuten 'Parents Just Don*t Understand' albumagatik. Dj Jazzy Jeff aurpegi ezaguna da, baita ere, telebistako 'El príncipe de Bel-Air' serie ospetsuaren jarraitzaileentzat. Izan ere, seriean Jazz-ena egiten zuen, Will-en lagun hurkoarena.
Musika berriz entzun ahal izango da Guggenheim Bilbao Museoko zabaldegian irailaren 1ean. Egun hori atseden-eguna izango da munduko txapelketan, eta ez da partidurik jokatuko. Gau horretan, Klaxons izeneko Ingalaterrako indie rock hirukoteak eta Getxoko We are standard taldeak joko dute.
Kontzertua We are standard taldearen emanaldiarekin hasiko da, euskal talderik nazioartekoenetarikoa une honetan. Ondoren, Klaxons taldea igoko da agertokira. Klaxons taldeak sariak jaso ditu Mercury Prize edo New Musical Express Awards ekitaldietan, eta Europako eta Ameriketako Estatu Batuetako jaialdi onenetan jo du.
