DONOSTIA, 25 May. (EUROPA PRESS) -
Donostiako Orfeoiak Rossiniren "Petite Messe Solennelle" obra interpretatuko du Bilboko Arriaga Antzokian datorren larunbatean, maiatzak 28. Sainz Alfaroren zuzendaritzapean arituko da abesbatza donostiarra, eta Gerardo Rifon organista eta Patxi Aizpiri pianista ere izango dira. Halaber, Donostiako Orfeiko kideak diren Elena Barbe sopranoak, Ainhoa Zubillaga mezzosopranoak eta Jesus Garcia Arejula baritonoak eta Jose Luis Sola tenoreak parte hartko dute. Kontzertua 20:00etan izango da.
Orfeoi donostiarreko arduradunek adierazi dutenez, "Petite Messe Solennelle" musika erromantiko erlijiosoaren gailurretako bat da eta bere errepertorioan dago 1982tik. Bilbon interpretatuko den bertsioa 1863an konposatu zuen Rossinik, piano, harmonium, lau bakarlari (sopranoa, altua, tenorea eta baxua) eta abesbatza mistoarentzat. Ondoren, bertsio orkestratua egin zuen, "zahartzaroko azken bekatua" bere hitzetan, eta 1869an estreinatu zen, bera hil eta urte betera.
Obra hau Pillet-Will kondeak enkargatu zion bere emazte Louisentzat eta Pesaroko musikariak harmonizazioko moldeak hautsi zituen eta bere garaiko konpositoreetatik urruntzen hasi zen. "Formen sinpletasunaren atzean modernitatera daraman ausardia dago", diote Donostiako Orfeoitik.
"Petite Messe Solennell" obrak ordu bete pasa irauten du eta Rossiniren "musikazko testamentua" da, ondoren obra bakan batzuk baino ez baitzituen egin, Parisko Erakusketa zela-eta Napoleon II.ari eskainitako himnoa esaterako. Obrak 14 zati ditu lanak eta horietako batzuk ezagunak dira Felliniren "E la nave va" (1983) filman entzun baitaitezke. Pedro Almodóvarrek ere obra honetako "Kyrie" erabili zuen "La mala educación" filman, Cor Vivaldi-Petits Cantors de Catalunyak abestuta.
