DONOSTIA, 27 Jun. (EUROPA PRESS) -
Donostiako Udalak eskaera azterketa egingo du Antiguako auzotarren artean Miramar jauregiaren azpian aparkalekua egiteari buruz. Azpiegiturak jauregiaren erabilera osatu eta parkean zein jauregian ia eraginik izango ez lukeela adierazi dute Donostako Udaletik.
Uztailaren lehen astean Antigua auzoko 2.751 etxebizitzatan erroldatuta dauden 4.883 auzotarrek gutuna jasoko dute. Bertan, proiektuari buruzko informazioa emango zaie eta aparkalekua izateko interesa duten ala ez azaldu ahal izango dute. Helburua da jakitea zenbateko eskaera dagoen Donostiako Udalak sustatuko lukeen erabilera pribatuko aparkaleku baten inguruan.
Eneko Goia Donostiako alkateak adierazi duenez, "ekimen honek lagunduko du Miramar jauregiaren etorkizuneko proiektua aztertzeko, eta horretan ari dira jauregiaren Partzuergoa osatzen duten Eusko Jaurlaritza, Gipuzkoako Foru Aldundia eta Donostiako Udala".
Gaur egun, Miramar jauregia Eusko Ikaskuntzaren eta Euskal Herriko Unibertsitatearen (EHU) Uda Ikastaroen egoitza da. Duela gutxi arte Musikene Goi Mailako Musika Zentroaren egoitza ere izan da, Benta Berriko eraikin berrira aldatu arte.
Halaber, aparkaleku plaza bat hartzeko interesa duten hiritarrek deiak jasotzeko plataforma batekin telefonoz kontaktua egin ahal izango dute. Plataforma Logikaline enpresak kudeatuko du eta kontsultak jasoko ditu 09:00etatik 20:00etara, astelehenetik ostiralera. Interesatuek inkesta bati erantzun beharko diote, alde batetik, interes maila jakiteko -oso interesatua, interesatua edo gutxi interesatua-, eta bestetik, emakidan hartu edo plaza erosi nahi duten jakiteko. Sei astetan jasoko da informazioa eta, ondoren, zenbateko eskaera dagoen baloratuko da. Azterketaren emaitzak irailean jakingo dira.
Auzoaren gune horretan 640 motor eta 1.987 ibilgailu daude erroldatuta. Egun, 470 garaje daude auzoko gune horretan, eta plaza eskatu ahal izango dute auzotarrek eta saltokietako jabeek, profesionalek edo industrialek.
