BILBO, 23 (EUROPA PRESS)
Etorkinak 3.602 gehiago izan ziren joaleak baino Euskal Autonomia Erkidegoan (EAE) 2014. urtean, eta etorkinen %63 Bilbo, Donostia eta Gasteizera heldu ziren, Eustat Estatistikaren Euskal Erakundeak landutako datuen arabera.
Herrialdeka, Gipuzkoak 2.195 pertsona irabazi zituen (migrazio saldo handiena zifra absolutuetan), Arabak 1.326, eta Bizkaiak 82. Hiru hiriburuek saldo positiboak izan zituzten: Gasteizen 1.446 pertsona gehiago, Donostian 510 gehiago, eta Bilbon 298 gehiago.
EAEren eta Espainiako Estatuko gainerako erkidegoen arteko mugimenduetan, joan den urtean 2008an hasitako joera positiboak jarraitu zuen, 5.809 pertsona gehiagorekin, haietako %83, atzerritarrak. Atzerriarekin, berriz, saldo negatiboa izan zen, 2.207 pertsona gutxiagorekin, hau da, joan zirenak etorri zirenak baino gehiago izan ziren.
Erkidegoz kanpoko mugikortasunari dagokionez, 2014an EAEko mila biztanletik 31 mugitu ziren (milako 37,8 Araban, milako 28,6 Bizkaian eta milako 31,9 Gipuzkoan).
EAEra, batez ere, ondoko autonomia erkidegoetatik heldu zen jendea: Gaztela eta Leon, Madril, Katalunia, Kantabria, Andaluzia eta Valentziatik. EAEko joale gehien erakarri zuten erkidegoak, hurrenkera honetan, Madril, Gaztela eta Leon, Kantabria, Katalunia, Andaluzia eta Nafarroa izan ziren; seien artean estatu barruan mugitu ziren EAEko joaleen %65 hartu zituzten.
Bestalde, 2014an 18.602 atzerritar heldu ziren; haietatik 8.022 beste erkidegoetatik (nagusiki Katalunia, Madril, Valentzia, Andaluzia, Gaztela eta Leondik) heldu ziren, eta 10.580 atzerritik zuzenean.
EAEtik badoazen pertsonen %45 atzerritarrak izan ziren, eta haien arteko %78 atzerrira joan ziren. Guztira, 14.332 atzerritar joan ziren joan den urtean. Joaleen batez besteko adina 36,0 urte izan zen, etorkinena (33,1 urte) baino handiagoa. Etorkinen %52 gizonak ziren, eta %48 emakumeak; joaleen artean, berriz, %54 eta %46 ziren portzentajeak.
BIZILEKU ALDAKETA
Bestalde, EAEko biztanleen %9,9k bizileku aldaketaren bat egin zuen 2014an, eta kasuen %69an EAEn bertan izan zen aldaketa, hau da, ia 2013ko zifra berberak.
EAEn 214.810 aldiz aldatu zen ohiko bizilekua iaz, eta 97.021 kasutan udalerrian bertan. Erkidego barruko mugimenduak, bai jatorria, bai helmuga EAEn, 50.409 izan ziren. Erkidegoaz kanpotikoak 35.491 izan ziren (jatorria EAEtik kanpo eta helmuga EAEn), haietatik, 12.746 atzerritik.
Azkenik, erkidegotik kanporako 31.889 emigrazio izan ziren (jatorria gurean eta helmuga EAEtik kanpora). Haietako 14.953ren norakoa atzerria izan zen, hau da, 2013an baino %16 gutxiago.
