BILBO, 15 (EUROPA PRESS)
Guggenheim Bilbao Museoak lankidetza hitzarmen bat sustatu eta sinatu du Euskal Herriko Unibertsitatearekin (EHU), Deustuko Unibertsitatearekin eta Mondragon Unibertsitatearekin, bere 20. urteurrenaren baitan. Akordioari esker, hiru unibertsitateetako edozein fakultatetan matrikulatutako ikasleak Guggenheim Bilbao Museoaren Lagun izango dira, 5 euroko kopuru sinbolikoaren truke.
Nekane Balluerka EHUko errektoreak, Vicente Atxa Mondragon Unibertsitateko errektoreak, Jose Maria Guibert Deustuko Unibertsitateko errektoreak eta Juan Ignacio Vidarte Guggenheim Bilbao Museoko zuzendari nagusiak sinatu dute hitzarmena, ostiral honetan, Bilboko museoan.
Ekimenaren helburua unibertsitateko ikasleak museora hurbiltzea da, baita jardueretan parte hartzera eta erakusketak bisitatzera bultzatzea ere, "unibertsitate garaian jasotzen duten prestakuntza pertsonal nahiz akademikoa osatzen lagunduko baitie". Modu honetan, museoak %75eko deskontua egingo du Ikasle Lagun txartelaren egungo prezioaren gainean -20 euro urtean-, eta unibertsitateek konpromisoa hartu dute ekintza hori zabaltzeko, ikasleekin dituzten komunikazio kanalen bitartez.
Lagun gisa alta eman nahi duten unibertsitate ikasleek museoko Community deritzon mahaitik pasa beharko dute, beren datuak eman eta fakultateren batean ikasten ari direla egiaztatzen duen agiria aurkeztu (ikasle txartela, matrikula, unibertsitateetako idazkaritzako ziurtagiria edo antzekoak, datarekin betiere), 5 euro ordaintzearekin batera. Modu horretan, Museoaren Ikasle Lagun izatera igaroko dira automatikoki, eta Museoaren Lagunen kolektiboak dituen abantaila zabalak izango dituzte.
Onura horien artean daude, besteak beste, programazio artistikoaz gozatzeko nahi beste aldiz eta doan museora sartzeko aukera (aldi baterako 12 erakusketa izango dira 2018an, bilduma iraunkorraz gain); deskontua musutruk ez diren museoaren jardueretan; Lagunentzat soilik diren jardueretan parte hartzeko aukera; deskontuak denda-liburudendan eta kafetegian; deskontuak beste kultur erakunde batzuetarako sarreretan, hala nola Bilboko Arte Ederren Museoan, Arriaga Antzokian edo BOSen; museoko jarduera eta edukien inguruko informazioa jasotzea; doako sarrera Guggenheim sareko beste museoetara. Gainera, ilararik egin gabe sartu ahalko dira museora zuzenean, Lagun txartela mugikorrean erakutsita.
ART AFTER DARK
Gazteen artean arrakasta gehien izaten duen Guggenheim Bilbao Museoaren jarduera Art After Dark izaten da. Hilean behin, ostiralez, mila pertsona inguru biltzen ditu emanaldiak, eta bertaratzen direnek erakusketak gauez ikusteko aukera dute, Atrioan jarduten duten nazioarteko dj ezagunen musikaren erritmora.
Kasu horretan, publiko orokorrarentzako sarrera 13 euro izaten da, eta 9 euro Lagunentzat. Modu honetan, sinaturiko akordioari esker, saio bakoitzean 4 euro aurreztuko dituzte ikasleek aurrerantzean.
Halaber, Lagunentzako soilik diren jardueren adibide bat da Lagunentzako Ateak Zabalik jardunaldia. Hain zuzen, aurten datorren astelehenean izango da, abenduaren 18an, eta museoaren alderdi eta arlo ezezagunenetan zehar bisita gidatuak egingo dira.
Gaur egun, ia 17.000 pertsonako Lagun sare sendoa du museoak. Lagun horiek ekarpena egiten diote urtero museoari, eta "erakundearen erroak eta indarra izan dira haren ibilbidearen lehen 20 urteetan". Hitzarmenak abantaila garrantzitsuak biltzen ditu, eta hari esker EAEko unibertsitate ikasleei helduko zaizkie, "aurrekontu falta artea eta kulturaz gozatzeko eragozpen izan dadin ekidingo baitu".
