DONOSTIA, 28 (EUROPA PRESS)
Donostiako Udalak kanpaina berria jarriko du martxan emakumeak suhiltzaileen lan eskaintza publikora aurkez daitezen animatzeko. Duñike Agirrezabalaga Berdintasuneko zinegotziak espero du emakumeak ere izango direla maiatzean egingo diren suhiltzaile izateko sarbide probetan.
"Suhiltzaile izateko probetan emakumeen eta gizonen arteko aukera berdintasuna bermatzeko asmoz, eta Emakundek ezarritako irizpideei jarraikiz, Berdintasun Bulegoak probei buruzko kontsulta egin zien Euskal Herriko Unibertsitateko Kirolen Zientzietako adituei. Haiek eginiko gomendioei jarraituta, proba guztiak haztatu eta emakumeen ezaugarri fisiologiko eta morfologikoetara egokituko dira", azaldu du zinegotziak
Probek "oso zorrotzak" izaten jarraitzen dutela ziurtatu du, baina espero duela "gogotik prestatzen dituzten emakumeek" gainditu ahal izatea, "gaur egun ez baitago emakumezkorik suhiltzaileen zerbitzuko langileen artean".
Agirrezabalagaren hitzetan, "errekrutatzea beste zailtasun bat da halako probetan. Suhiltzaile lanbidea oso maskulinizatuta dago, eta ez da erraza gizonentzako bakarrik eginiko lana den ideia baztertzea. Horregatik jarri dugu martxan kanpaina, suhiltzaile izan nahi duten emakumeak probetara aurkez daitezen, eta beraiek ere suhiltzaile izan daitezkeela senti dezaten".
