DONOSTIA, 4 (EUROPA PRESS)
Piotr Barzcak Europako Ingurumen Bulegoko hondakinen politikako arduradunak Gipuzkoako eredua defendatu zuen joan den martxoaren 23an Eusko Jaurlaritzaren plangintzaren aurkezpenean, eta "beste lurraldeek jarraitu beharreko eredutzat" jo zuen.
Barczakek Euskal Autonomia Erkidegoko (EAE) Hondakinak Kudeatzeko Planaren aurkezpen ekitaldian parte hartu zuen, Europar Batzordearen irizpideen berri emateko, Jaurlaritzak gonbidatuta, eta bere hitzaldian Gipuzkoa hondakinen alorrean egiten ari den kudeaketa ona nabarmendu zuen.
Zehazkiago, Gipuzkoak hondakinen prebentzio eta birziklapenean lortutako emaitzak goraipatu zituen, eta erraustegia alboan uzteagatik Gipuzkoak izango dituen ekonomia eta ingurumen onurak azpimarratu, Gipuzkoako Hondakinen Kontsortzioak (GHK) astelehen honetan jakinarazi duenez.
Joan den martxoaren 23an Bilboko Bizkaia Aretoan egin zen ekitaldian, Ana Oregi Eusko Jaurlaritzako Ingurumen eta Lurralde Politikako sailburuak eta Josean Galera Eusko Jaurlaritzako Ingurumen sailburuordeak ere parte hartu zuten, baita Jaurlaritzako Ingurumen administrazioko hainbat karguk eta Ingurumeneko Klusterra osatzen duten hainbat enpresetako ordezkariek ere.
Bideokonferentzia bidez egindako hitzaldian, Piotr Barczak Europar Batzordea Ekonomia Zirkularra sustatzeko burutzen ari den ekimenez mintzatu zen, baita Zero Zabor Programa indarrean jartzeko ematen ari den pausoez ere. Era berean, hondakin gutxiago sortzeko eta birziklatzearen aldeko politika eraginkorrak sustatzeko oraindik egin behar den ahaleginaz hitz egin zuen.
GIPUZKOA
Hitzaldiaren une horretan, Gipuzkoak zabaldutako bidea goraipatu zuen, eta "beste lurraldeek jarraitu beharreko eredutzat" jarri zuen, "ez soilik hondakinen bilketa sistema eraginkorren bidez lortzen ari den prebentzio eta birziklatze maila altuengatik, baita erraustegia albora uzteagatik ere".
Piotr Barczakek GHKri adierazi dionez, "hitzaldi horretan hainbat adibide jarri nituen, Europa osoan zehar banatutako komunitateei buruzkoak, praktika onak aurrera eramaten ari direnak, eta birziklatzeari, gaikako bilketari eta berrerabiltzeari dagokienez helburu garrantzitsuak lortzen ari direnak". "Komunitate horien artean adibiderik garrantzitsuenetako bat Gipuzkoan dago", gaineratu du.
Europar ordezkariak azpimarratu du hondakinen inguruan kontzientziazioa handitzeaz eta zabor hondakin guztien kopurua murrizteaz gain, Gipuzkoan "hondakinen erraustegia eraikitzeko proiektuaren aurka egitea" ere lortu dutela azpimarratu du.
"Gipuzkoan ulertu dute erraustegia teknologia zaharkitua dela, gure airea kutsatzeaz gain, baliabideak galtzera eramaten gaituela. Hondakinak errausten ditugunean, giza sormena ere galtzen dugu, dirua galtzen dugu, eta beste hainbat soluzio berri galtzen ditugu, ekonomiarentzat, lanpostuentzat eta ingurumenarentzat hobeak, merkeagoak eta eraginkorragoak diren soluzioak", azaldu du.
