BILBO, 15 Feb. (EUROPA PRESS) -
Kalitatea Fundazioak Eusko Labela duen Esne-Bildotsaren Jaia ospatuko du larunbatean Bilboko Plaza Berrian, Bizkaiko Foru Aldundiko Nekazaritzaren Sailaren, Bilboko Udalaren, BBKren eta Alde Zaharreko Merkatarien Elkartearen laguntzarekin. Ekimenaren helburua produktua sustatzea, bere ezaugarriak jakinaraztea eta Bizkaiko artzainak babestea da.
Antolakuntzatik azaldu dutenez, goizeko 9:30etan, Carlos Ibarrondo aditua Bizkaiko ekoizleek ekarritako 40 esne-bildotsak burduntzian erretzen hasiko da. Burduntzian egindako erreketa dela medio, 1.500 pintxo eskainiko dira 12:30etatik aurrera. Pintxoak euro baten truke banatuko dira eta jasotako dirua Caritasi emango zaio.
Dastaketa gunearen ondoan, Bizkaiko ekoizleen produktuak salduko dituen nekazaritza-azoka txikia ere izango da. Bertan egongo dira Lea Artibai sagardoa, Basalbeiti txakolina, Florencio Txurrukaren gazta eta Maite Leanizbarrutiaren ogia.
Benetako Eusko Labela duen esne-bildotsa azaroa eta maiatza artean ekoizten den sasoiko produktua da, %100ean naturala, eta "Latxa" eta "Karrantza" arrazetakoa. Bere amaren esnea besterik ez du hartzen bildotsak eta hiru edota bost aste duenean sakrifikatzen da. Horrela lortzen da haragi mamitsua, uxterra eta zaporetsua.
Produktua kontrolpean dago bere fase guztietan: ekoizpenetik, baimendutako artzainen erregistroarekin, bildots bakoitzaren identifikazioarekin eta beren elikaduraren eta jatorri geografiko eta genetikoaren kontrolarekin, hiltegiraino. Bertan tekniko espezializatuek hilketa lanak ikuskatzen dituzte eta aukeraketa zorrotza egiten dute.
Produktuaren arautegian agertzen diren kalitate ezaugarriak betetzen dituzten bildotsei bakarrik Eusko Labela ezarriz. Eusko Labela duen esne-bildotsak lau kontrol etiketa darama, bakoitza laurden batean, Eusko Label logotipoarekin, hilketaren datarekin eta hiltegiaren izenarekin.
