SIDNEY, 22 Jul. (EUROPA PRESS) -
Tasmaniako itsasoan joan den astean gertatu zen Richter eskalako 7,8 graduko lurrikarak 30 zentimetro elkartu ditu Australia eta Zeelanda Berria.
Geo Net Zeelanda Berriko lurreko informazio sistemaren zuzendari Ken Gledhillek adierazi du joan den asteko lurrikara indartsua beste edozein tokitan kalte larriak eragingo zituela, baina "Zeelanda Berria zorionekoa" dela. Horrela, lurrikarak Zeelanda Berria eta Australia gehiago hurbiltzea besterik ez duela egin azaldu du.
Lurrikara oso indartsua izan zen, baina tsunami txiki bat bakarrik eragin zuen, Zeelanda Berriko hego-mendebaldeko kostaldera iritsi ziren metro bateko olatuekin. Gainera, zonaldeko biztanleek bazekiten zer zetorren. Joan den astekoa Zeelanda Berrian azken 78 urteetan izan den lurrikararik handiena izan arren, kalte material txikiak besterik ez zituen eragin zenbait eraikinetan.
Zeelanda Berriko hegoaldeko irlako hego-mendebaldeko kostaldea 30 zentimetro mugitu bada, ekialdeko kosta zentimetro bat besterik ez da mugitu mendebalderantz, Gledhillek tokiko hedabideei jakinarazi dienez.
Seismoak ohikoak izaten dira lurreko zonalde horretan, Zeelanda Berria plaka australiarrek eta Pazifikoko plakek bat egiten duten tokiaren gainean dagoelako.
