DONOSTIA, 14 Ene. (EUROPA PRESS) -
Txalo Produkzioak konpainiak "Arrastoak" izenburuko antzezlana estreinatuko du bihar Donostiako Antzoki Zaharrean. Ramon Agirre eta Asier Hormaza protagonista dituen obra Begoña Bilbaok zuzentzen du, eta igandera arte izango da ikusgai Antzoki Zaharrean, Donostia Kulturako arduradunek jakinarazi dutenez.
"Arrastoak" obran, Andrew Wyke intrigazko nobelagile ospetsua da. Jokozale amorratua ere bada, eta munduko txoko guztietatik ekarritako jokoz betea du etxea. Egun batean, Milo Tindlek bisita egingo dio; Tindle italiar jatorriko gizon gaztea da, bidaia-agentzia baten jabea. Elkarrekin solasean eta trago bat edaten ari direla, Andrewk plan bat proposatuko dio: ustez biak irabazle irtengo diren joko arriskutsu bat.
Txaloren azken produkzioaren saioak 20:00etan hasiko dira hiru egunetan eta sarrerak (15 eta 18 euro) salgai daude Victoria Eugeniako eta Antzoki Zaharreko leihatiletan, eta Kutxaren ohiko kanaletan (Telekutxa, Servikutxa eta www.kutxa.net webgunea).
