BILBO, 30 (EUROPA PRESS)
Euskadiko Ikasleen Orkestra (EIO) eta Jove Orquestra Nacional de Catalunya de Alevins (Kataluniako Gazte Orkestra) elkarrekin izango dira taula gainean ostiralean Donostiako Victoria Eugenia antzokian eskainiko duten kontzertuan, BBC Philarmonic orkestraren zuzendaria den Juanjo Mena gasteiztarra zuzendari dutela. Aurretik, ostegun honetan bertan, Vicen (Katalunia) ariko dira elkarrekin bi orkestra gazteak.
Eusko Jaurlaritzako Hezkuntza, Hizkuntza Politika eta Kultura Sailak jakinarazi duenez, antzeko helburuak dituzten bi gazte orkestra dira, hau da, orkestran jotzen ikastea eta, musikaren baloreen bitartez, norberaren garapen pertsonala lortzea.
Kontzertuotan "daukaten onena eman ahal izateko", euskal eta kataluniar musikari gazteek lan agenda oparoa osatu dute elkarrekin, klase eta entseguz beteriko aste intentsiboa izan baitute aste honetan Viceko L'Atlàntida Auditoriumean. Irakasle bikainez osaturiko talde baten laguntzaz, entseguak joan den larunbatean hasi ziren, eta ez dute etenik izan ostegun honetako azken entsegua egin arte, kontzertua baino ordu batzuk lehenago. Ostiralean Donostiara joango dira denak, Victoria Eugenia antzokian kontzertua eskaintzeko. Juanjo Mena igandean batuko zaie entseguetara musikari gazteei.
Topaketa berezi honetan, musikari gazteek sinfonismoan adierazgarria den obra bati aurre egin beharko diote, teknikoki eta musikalki oso zaila den obra bat: Berliozen "Sinfonia Fantastikoa". Obra hori interpretatzeko, bi orkestra gazteak Menaren zuzendaritzapean arituko dira. BBC Philarmonik orkestraren zuzendaria da gaur egun Mena, eta berriki Berlingo Filarmonikoa zuzendu du, zuzendari gonbidatu gisa.
