BILBO, 15 Ene. (EUROPA PRESS) -
Euskalmet Meteorologiaren Euskal Agentziaren iragarpenaren arabera, asteburuan aldaketa handirik gabe jarraituko dugu, zeru garbiarekin eta tenperatura atseginarekin. Behe-lainoarekin esnatuko gara eta Araba eta Nafarroako hainbat puntutan denbora luzez iraun dezake. Izotza ere egin dezake barnealdean.
Eguerdi partean, tenperatura maximoak oso atseginak izango dira; 17-18 gradura iritsiko dira termometroak kostaldean eta 12-15 gradu artean geratuko dira barnealdean. Hego haize leunarekin jarraituko dugu. Hiriburuetan, Bilbon 9 gradu espero dira gutxienez eta 19 gehienez; Iruñean 1 gutxienez eta 13 gehienez; Donostian 8 gutxienez eta 18 gehienez; Gasteizen 1 gutxienez eta 15 gehienez.
Itsasoan hego-osagaiko haizea ibiliko da, 3ko indarrarekin; lehenengo bi milietan itsaso kizkurra eragingo du eta gainontzekoetan itsaskirria. Ipar-mendebaldeko hondoko itsasoak 1,5-2 metro inguruko olatuak altxatuko ditu.
Uraren tenperatura 14 gradukoa da eta ikus-eremua hamar kilometrotik gorakoa izango da. Itsasgora 11:34an izango da, eta itsasbehera, 17:55ean.
