BILBO, 17 (EUROPA PRESS)
Gurutze Gorriak Turkiatik Europara iristen saiatzen diren pertsonen heriotzak arbuiatu ditu, 400 baino gehiago ito baitira urteko lehenengo 45 egunean, eta "premiazkotzat" jo du bide legalak eta seguruak ezartzea lehenestea indarkeriatik, jazarpenetik eta pobreziatik ihes egiten dutenentzat.
"Alferreko heriotza hauek lotsagarriak dira; bide seguruak ezarri behar ditugu orain. Heriotza ezin da izan bakean bizitzeko eta etorkizuna aurkitzeko oinarrizko giza nahiaren emaitza", azpimarratu du Karen Bjornestad Gurutze Gorriko eta Ilargi Erdi Gorriko Nazioarteko Federazioak Grezian duen arduradunak.
Gurutze Gorria lehen lerroan izan da errefuxiatuen krisia hasi zenetik, eta 74.000 boluntario baino gehiago joan dira Europako 28 herrialdetara 600.000 laguni arreta ematera.
Une honetan, Gurutze Gorriak errefuxiatuen krisiaren harira dituen kezka nagusietako bat tenperaturaren jaitsiera da. Eguraldi txarrak Europan lekualdatzen ari diren ehunka mila lagunen bizitza arriskuan jarriko du. Horregatik, Gurutze Gorriak gobernuei esan die neurriak har ditzatela segurtasuna eta beren oinarrizko beharrak asetzea bilatzen dituzten pertsonak babesteko.
Hipotermia da une honetan Europako Erdialdean eta Balkanetan dauden ehunka mila pertsonarentzako kezka nagusietako bat, eta bereziki adineko pertsonentzat, haurrentzat eta gaixotasunak edo bestelako gaitzak dituztenentzat.
Errefuxiatuen bideko gunerik gogorrenetako bat Balkanen pasabide naturalak dira, ehunka pertsona isolatuta eta eguratsaren menpe geratzen baitira. Gurutze Gorriarentzat une honetan lehentasunezkoa da oinarrizko laguntza: janari beroa, aterpea, beroa, tapakiak eta lo zakuak. Era berean, osasun unitate mugikorrak indartzen ari dira ibilbideetan zehar.
