BILBO, 7 Feb. (EUROPA PRESS) -
Euskal Autonomia Erkidegoan (EAE) hamar langile eta gehiagoko enpresa berritzaileen portzentajea %37,8 izan zen 2011. urtean. Ehuneko hau aldatu egiten da, eskualdeka ikusiz gero, Eustatek jakinarazi duenez.
Horrela, Arabako Gainerakoan (Arabako Mendialdea, Gorbeiako Inguruak, Arabako Ibarrak) hamar langile baino gehiagokoen enpresen erdia pasa (%50,9) berritzaileak izan ziren 2011n, eta Kantauri Arabarrean (%49,1).
Gipuzkoan, Tolosak eta Bidasoa-behereak izan ezik, gainontzeko eskualdeek %40ren gaineko portzentajeak zituzten; Debagoiena nabarmendu zen, enpresa berritzaileak %46,4 baitziren. Bizkaiari dagokionez, Markina-Ondarroa (%39,4), Plentzia-Mungia (%38,5), Durangaldea (%38,1) eta Gernika-Bermeo (%37,9) Euskadiko batez bestekoaren gainetik zeuden.
Enpresa berritzaileen portzentajerik txikienak, Gipuzkoan Bidasoa-behereak (%32,1) eta Bizkaian Arratia-Nerbioik (%33,4) zituzten. Aipagarria da Bilbo Handia (%34,2), enpresa-kopuru handienarekin berritzaileen proportzio txikienetakoa baitzuen, eta hori gertatu zen 2010ean zuen ratioa hobetu arren, horretan bakarretakoa izanik.
Hiriburuetan, Donostiaren (%42,8) eta Bilboren (%34,9) artean ia zortzi puntu zeuden enpresa berritzaileetan, eta Gasteizen %39,7 ziren hamar langile eta gehiagoko enpresa berritzaileak 2011n, ia bi puntu EAEko batez bestekoaren (%37,8) gainetik.
GASTUA
Berrikuntza-jardueretako gastuaz, beti hamar langile eta gehiagoko enpresetan, kantitaterik handienak hiriburuak barne dituzten eskualdeetan egikaritu ziren, baina kontzentrazio-maila ezberdina izan zen, batez ere Gipuzkoan. Araban eta Bizkaian, hiriburua dagoen eskualdean (Lautada eta Bilbo Handia) lurraldeko gastuaren %80 pasa egin zen; Gipuzkoan askoz gutxiago izan zen, Donostialdean %42 gastatu baitzen.
Araban, 432,4 milioi eurotik 377,3 milioi Lautadan gastatu ziren, eta Bizkaian 1.053,3 milioitik 846,2 milioi Bilbo Handian; Gipuzkoan, ordea, 728,3 milioitik 309,0 milioi Donostialdekoak izan ziren, baina kopuru garrantzitsuak geratu ziren lurraldeko beste eskualde batzuetarako, hala nola Deba Garairako 114,6 milioi eta Goierrirako 106,7 milioi. Bizkaian Durangaldea (95,2 milioi) nabarmendu zen Bilbo Handiaren atzetik.
Berrikuntza jardueretako gastua 2011. urtean Euskadiko hiru lurraldeetan eta hiru hiriburuetan hazi zen, batez ere Donostian (%17,8), non orain bi urteko mailetan aritu ziren.
