BILBO, 5 (EUROPA PRESS)
Bizkaiko Foru Aldundiak aldi baterako lekuz aldatu du hiriko hondakinen bilketa Artigasetik Jatako zabortegira, Artigasen aktibo zegoen ontzia edukieraren mugara iritsi eta bete egin delako. Maruri-Jatabe eta Lemoizko udalei lekualdaketaren berri eman zaie, eta astelehenean, otsailaren 8an, aldaketa hasiko da eta Artigaseko bigarren fasea amaitu arte iraungo du. Bigarren fase horretan isurketak egiteko bigarren ontzi bat gaituko da Bilboko zabortegi horretako eskuineko ibarrean. Lanen aurrekontua 4,8 milioi euro da, eta burutzeko epea bederatzi hilekoa.
Foru erakundeak jakinarazi duenez, Jatako hondakindegia jarduerarik gabe zegoen 2014ko urtarrilaren 1etik, eta ordutik, Ingurumeneko Agintaritzak jarduerarik gabeko zabortegietarako eskatzen dituen lanak burutu dira bertan; kasu honetan aurrez Tratamendu Mekaniko Biologikoko instalazioan tratatuko diren Bizkaiko hiri hondakinak jasoko dira.
Jata berriz abian jartzearekin, toki horretako biztanleei eragozpen ahalik eta gutxien eragiteko mugak ezarri dira hondakinak zabortegira eramango dituzten kamioien zirkulazioan eta bi txandatan baino ez dira ibiliko (goizez eta arratsaldez), astelehenetik ostiralera, eta larunbatean goizez baino ez.
Artigaseko hondakindegiko ontzi berriaren obren barruan isurketak egiteko bi zelda gaituko dira eta horrela eratuta geratuko da eskuineko ibarra betetzeko lehen fasea; indarrean dagoen arautegia betez ontzi hori iragazgaiztu egingo da. Halaber, kontuan hartuta ontzi horretan aurreko beste biltegiratze batzuk burutu direla, hondoa iragazgaiztu ez ezik, aldi berean azpiegitura gehigarriak eta osagarriak burutuko dira, adibidez drainatzeak, sarbideak edo gasa ateratzeko instalazioak.
