BILBO, 25 (EUROPA PRESS)
Bilboko Udaleko Euskara eta Hezkuntza Sailak eta Euskaltzaleen Topaguneak 12. urtez antolatu dute Ikusi eta Ikasi programa, 2 eta 8 urte bitarteko umeei zuzenduriko ikuskizunak eskainiko dituena. Ekimenaren helburua da euskararen erabilera bultzatzea ume bilbotarren artean, aisialdirako eta modu dibertigarrian, gurasoen artean euskararen transmisioarekiko atxikimendua sustatzea, kulturaren bidezko hezkuntza sustatzea eta kalitatezko programazioa eskaintzea.
Programaren 12. edizioko eskaintza era askotakoa da: antzerkia, magia, musika, pailazoak, dantza saioak, txotxongiloak, ipuin kontalariak, sukaldaritza lantegiak, mozorrogintza, musikoterapia, barreterapia eta sormenezko eraikuntza.
Programa astearte honetan hasiko da, urtarrilaren 26an, eta apirilaren 16an bukatuko. Guztira, aisialdia, kultura eta hezkuntza uztartzen dituzten 58 jarduera eskainiko ditu Begoña, Deustu, Basurtu, Errekalde, Castaños, Santutxu, Abando eta Zorrotzako udal zentroetan, Indautxuko Karmen eta Bilborock aretoetan, eta Tiboli eta Zamakola eskoletan. Aurten lehen aldiz Santutxu eta Zorrotzako udal zentroetan ere izango dira jarduerak.
Bilboko Udaleko eta Topaguneko arduradunek adierazi dutenez, "ahalegin handia" egin dute txikien artean oso harrera ona duen Ikusi eta Ikasi programari eusteko eta kalitatea hobetzeko. Horrela, 12. edizioan programazio berezia egongo da, eta guztira, 30 ikuskizun, 24 tailer eta gurasoentzako lau hitzaldi antolatu dira.
Programak 12 urte bete ditu jada, 2005ean hasi zenetik, aisialdian euskararen erabilera bultzatzeko asmoz ume bilbotarren artean, beti modu dibertigarrian. Iazko edizioan 6.861 pertsona batu ziren, eta magiaz, musikaz, sukaldaritzaz, antzerkiaz edota dantzaz gozatu ahal izan zuten.
Zehatzago, Begoñako udal zentroak 915 pertsona batu zituen, Bilborockek 900, Deustu Bidarteko udal zentroak 1.034, Errekaldekoak 838, Tiboli eskolak 566, Zamakola eskolak 199, Castañoseko udal zentroak 52, Abandokoak 380, Basurtukoak 327 eta, azkenik, Karmen aretoak 1.650.
