DONOSTIA, 20 Oct. (EUROPA PRESS) -
Ertzaintzaren agenteek 23 urteko gizonezko bat atxilotu zuten joan den larunbatean, Pasaiako (Gipuzkoa) ile apaindegi batean lapurtzen saiatzea egotzita. Ustezko egilea zauritu egin zen kristal bat apurtzerakoan, eta hutsik zegoen eraikin batean ezkutatu zen; bertara ere ilegalki sartu zen, Eusko Jaurlaritzako Segurtasun Sailak jakinarazi duenez.
Joan den larunbat goizeko 07:00ak aldera, Ertzaintzaren zenbait patruila Pasaiako establezimendu batera joan ziren, zulo handi bat zuelako atearen kristalean. Antza denez, ustezko lapurrak ihes egin zuen zauritu zelako eta lekuko batek harrapatu zuelako.
Ertzainek odol arrastoak aurkitu zituzten tokian; espaloitik ere bazeuden, Pasai Antxotik Donostiara doan zatian. Azkenik, agenteak eraikin batera iritsi ziren; horrek baranda bat zuen, eskailera moduan jarrita, lehen pisuko balkoira iristeko.
Patruilak jakin zuen etxebizitza hutsik zegoela eta, dagokion baimenarekin, agenteek ikuskatu egin zuten, harik eta ganbaran zauritutako gizona aurkitu arte. Lesio sakon bat zuen eskuineko oinean. Atxilotu egin zuten, bi delitu egotzita: saltoki batean indarrez lapurtzea eta etxebizitza usurpatzea.
