BILBO, 17 (EUROPA PRESS)
LAB sindikatuak indarkeria matxista salatzeko kalera ateratzeko deia egin du, eta indarkeria sexista "egungo sistema heteropatriarkarraren izozmendiaren muturra" eta "erro sakon eta zabalak dituen matxismoaren adierazpiderik bortitzena baina ez bakarra" dela salatu du.
Sindikatuak gogoratu du indarkeria matxistako "kasu larrien" berri izan dela Euskal Herrian azken egunotan. Horrela, astelehenean, gizon batek emakume bat hil zuen Burlatan eta gorpua ibaira bota ondoren, bere burua entregatu zuen poliziaren aurrean. Halaber, Sara Majarenas ETAko presoaren bikotekide ohia bere alaba hiltzen saiatu zen, eta horrez gain, bi gizon atxilotu zituzten igandean Gasteizen eta Durangon, bikotekideak jotzea leporatuta.
"Emakumeen kontrako indarkeria matxistaren azken biktimak izan dira. LAB sindikatutik indarkeria sexista egungo sistema heteropatriarkarraren izozmendiaren muturra dela adierazi nahi dugu, erro sakon etazabalak dituen matxismoaren adierazpiderik bortitzena, baina ez bakarra", esan du.
Horrela, "arazo sozial eta politiko bat" dela ziurtatu du, "alternatibak dituena", eta, hori dela eta, sindikatuaren iritziz, "egungo ereduak bultzatzen dituen botere harremanak iraulita zein harreman parekide eta justuagoetan oinarrituko den jendarte bat eraikita egingo diogu aurre indarkeriari modurik eraginkorrenean".
Horrekin lotuta, "ezinbestekoa" deritzo erasoak "ozen salatu eta jendarte mobilizazioa hauspotzea". Horrela, Emakumeen Mundu Martxatik "Eraso sexistarik ez" lelopean deitu diren deialdietan parte hartzeko deia egin die LABek langileei eta herritarrei.
