BILBO, 6 (EUROPA PRESS)
Arantxa Tapia Eusko Jaurlaritzako Ekonomiaren Garapen eta Azpiegituretako sailburuak industriaren aldeko "benetako apustu irmoa egiteko" eskatu dio astelehen honetan Luis de Guindos Espainiako Gobernuko Ekonomia, Industria eta Lehiakortasuneko ministroari, Madrilen izan duten bileran.
Tapiarekin batera Estibaliz Hernaez Berrikuntzako, Teknologiako eta Lehiakortasuneko sailburuordea eta Javier Zarraonaindia Industriako sailburuordea izan dira bileran. Bertan, bi erakundeek partekatzen dituzten jarduketa eremuak berrikusi dituzte, hau da, I+G+B politikak eta industria.
Industriaren aldeko politikak direla eta, Tapiak gogoratu du Euskadi aurreko legegintzaldian ez zela "batere pozik" egon, eta batez ere ontzigintza eta altzairua sektoreetan bizi izandakoa ekarri du gogora. Ildo horretan, De Guindosi eskatu dio industriarekin "lehentasunezko konpromisoa" hartzeko, kontuan izanik sektore horrek euskal ekonomian duen pisua, eta aintzat hartuta Europar Batasunetik estatu eta eskualdeetako industria sektorea sendotzeko datozen gomendioak, oro har, ekonomiaren motor bilakatzeko.
Jaurlaritzako eta Espainiako Gobernuko ordezkariek makina erraminta, aeronautika, automobilgintza eta ontzigintza sektoreetan ere jarri dute arreta. Horrela, euskal ordezkariek Ekonomia, Industria eta Lehiakortasuneko Ministerioari eskatu diote balora ditzala enpresek euren aktiboak berritzeko laguntzak, Jaurlaritzaren Makinen Renove programaren antzera.
Halaber, aeronautikan egiten diren epe luzerako eta bolumen handiko inbertsioetara zuzendutako finantziazio tresna babesten jarraitzeko eskatu diote, hala eskatzen baitute Euskadiko aeronautika enpresa garrantzitsuenek.
Gainera, jakinarazi dio Basque Industry 4.0 ekimena indartzeko asmoa duela, Europako estatu eta eskualdeekin elkarlanean, euskal industriak gai horretan "erreferenteak diren aliatuak" behar dituela iritzi diolako.
I+G+B PROGRAMAK
Topaketan, bi instituzioetako ordezkariek ikerketarako, garapenerako eta berrikuntzarako (I+G+B) programak xehetasunez koordinatzea zein egokia den planteatu dute, euskal enpresek eta eragile zientifiko-teknologikoek merezi duten erritmoan egiteko aurrera Europan, kontuan hartuta zientziaren, teknologiaren eta berrikuntzaren inguruko euskal sistema Europan erreferentea dela.
Gauzak horrela, Eusko Jaurlaritzak Espainiako Gobernuari eskatu dio I+G+B politikaren aldeko apustua egiteko, Euskadin alderdi publikoak eta pribatuak egiten duten ahalegina eta uste sendoa kontuan hartuta.
"Euskadin I+G+B politikan sinesten dugu, eta Ministerioaren baliabide eta politiken laguntza eta babesa jaso beharko lituzkeen sistema dugu. Laguntza eta babes hori garrantzitsuak dira, enpresa sareak eta zentro teknologikoek marjina eta jarduteko gaitasuna irabazteko", esan du Tapiak.
