BILBO, 6 (EUROPA PRESS)
Pedro Azpiazu Eusko Jaurlaritzako Ekonomia eta Ogasun sailburua EH Bildu, Elkarrekin Podemos eta PPrekin bilduko da datozen asteartean eta asteazkenean, martxoaren 7an eta 8an, Euskal Autonomia Erkidegoko (EAE) 2017. urterako aurrekontuen inguruko negoziazioari ekiteko, jarrera "irekiarekin" eta "guztiekin" adosteko borondatearekin, Ekonomia eta Ogasun Saileko iturriek Europa Press berri agentziari adierazi diotenez.
Azpiazuk EH Bildurekin hasiko ditu bilerak, asteartean, eta hitzordua eguerdiko 12:00etan izango da. Egun berean, baina arratsaldeko 16:00etan, Ekonomia eta Ogasun sailburua Elkarrekin Podemos alderdiko ordezkariekin bilduko da. PPrekin bilera asteazkenean izango da, 12:00etan.
Eusko Jaurlaritzako sailburu guztiek dagozkien aurrekontu sailak aurkezteko Eusko Legebiltzarrean egindako agerraldiak ostegun honetan bukatu ondoren egingo dira bilerak.
Lakuako Gobernuak 11.059,7 milioi euroko aurrekontu proiektua onartu zuen otsailaren 21ean, hau da, 2016ko aurrekontuetan baino 126 milioi euro gehiago (%1,2ko igoera). Jaurlaritza osatzen duten EAJk eta PSE-EEk gutxienez oposizioaren alderdi baten babesa edo abstentzioa behar dute aurrekontuak Eusko Legebiltzarrean onartzeko, gehiengo osoa izateko boto bat behar dutelako.
