MADRIL, 8 Jun. (EUROPA PRESS) -
Jorge Semprun (Madril, 1923) idazle, intelektual eta politikari espainiarra hil zen atzo, asteartea, ekainak 7, Parisen bizi zen etxean, 87 urte zituela. Semprunek izaera autobiografiko handiko obra literario luzea dauka, Espainiako zein Europako XX. mendeko gertakari garrantzitsuenen inguruan gogoeta eginez.
Gerra Zibilaren ondorioz, familiarekin Frantziara eta Hagara joan zen; hiri holandarrean Errepublikaren aldeko lana egin zuen bere aitak. Parisen kokatu zen 1939an eta, komunismoarekin konprometituta, okupazio alemanaren aurka borroka egin zuen Erresistentzia frantsesean. 1943an atxilotu eta kontzentrazio-esparru aleman batera deportatu zuten.
Bigarren Mundu Gerran zehar Buchenwald-eko kontzentrazio-esparruan 15 hilabete konfinatuta egon zen. Arrrasto sakona utzi zion gertaera hark, baina bere azken liburuetan ("La escritura y la vida" eta "Viviré con su nombre, morirá con el mío") bakarrik hitz egin zuen garai horretaz.
1945ean askatu ondoren, Espainiako Alderdi Komunistako (PCE) erbesteko kide nabarmena bihurtu zen. Federico Sanchez ezizenarekin ezkutuko eragile aktiboa izan zen Espainia frankistan, baina 1964an alderditik kanporatu zuten ildo ofizialarekin desadostasunak izan zituelako. 1988 eta 1991 artean Kultura ministro izan zen Felipe Gonzalezen Gobernu sozialistan.
Bere eleberrien artean nabarmentzekoak dira "El largo viaje", Erresistentzia frantseseko kide izan zeneko egunetan oinarrituta, "Aquel domingo", non dialektika marxista eta XX. mendeko ideologien sorrera eta gainbehera aztertzen dituen, edo "Autobiografía de Federico Sánchez", erbesteko militante komunista izan zeneko esperientzia eta frankismoaren azken urteetan eta trantsizio espainiarraren lehenetan izan zuen jarduera oinarri hartuta. Bere azken lanean -"Federico Sánchez se despide de ustedes"- Kultura ministro izan zeneko esperientzia kontatzen du.
Bere obra literarioak sustrai autobiografiko sakonak ditu, eta, besteak beste, Formentor (1964), Planeta (1977), Femina (1969 y 1994), liburu-saltzaile aleman Bakearen Saria (1994), Jerusalen (1997), Nonino (1999), Goethe domina (2003), Fundación Lara (2003), Annetje Fels-Kupferschmidt (2006) eta Terenci Moix (2010) sariak eskuratu ditu.
Semprunen literatura-ekoizpen luzean daude "Netchaiev ha vuelto" (1988), "La escritura o la vida" (1995), "Adiós, luz de veranos" (1998), "Aquel domingo" (1999), "Viviré con su nombre, morirá con el mío" (2001), "Veinte años y un día" (2003), "El largo viaje" (2004), "El hombre europeo" (2005) edo "Pensar en Europa" (2006) obrak, besteak beste.
