BILBO, 25 Ene. (EUROPA PRESS) -
Mikel Martinez aktoreak "Larria Kutsakorra Mendebaldekoa (LKM)" antzezlana eramango du Bilboko BBK aretora ostegunetik larunbatera arte, "Hurbiltasun Antzokia" programaren baitan. Arriaga Antzokiak prestaturiko programazio honek bere 2011-2012 sasoiko programazioa osatzen du, formatu txiki eta ertaineko ikuskizunak eskainiz genero guztietan.
Egitasmoaren arduradunek jakinarazi dutenez, "Larria Kutsakorra Mendebaldekoa" 11:00etan eta 20:00etan taularatuko da ostegunean eta ostiralean, eta 20:00etan larunbatean. Patxo Telleriak eta Jokin Oregik idatzi dute Tartean konpainiaren produkzio hau. Oregik berak zuzentzen du eta Mikel Martinezek interpretatzen du, hiru pertsonaia desberdinen azalean sartuz eta batetik bestera jauzi eginez abiada biziko antzerki jolas batean.
Antzezlana, farmazia-industriaren negoziari buruzko "komedia basatia" da. Osasun publikoa eta negozioa da komedia honen gaia. Ukitu "basatia" du eta gaiaren inguruko hausnarketa suspertu nahi du emozioz, irrikaz eta samurtasunaz.
Argudioari dagokionez, botikak egiten dituen enpresa pribatu batek laborategian gripe suntsigarri bat sortzea erabakitzen du, sendabidea ahalik eta azkarren lortzeko. Baina gaitz berriak eta bere sendabideak nola funtzionatzen duten ikusteko, ezinbestekoa da pertsonekin esperimentu frogak egitea.
