BILBAO, 28 Ago. (EUROPA PRESS) -
Iñigo Urkullu lehendakariak Eskoziako prozesua eredugarria dela uste du, "erabili duen metodoarengatik, aldeen arteko akordioan oinarrituta baitago". Kurtso politiko berriaren lehen Gobernu Kontseilua amaitu ondoren egindako prentsaurrekoan adierazi duenez, hori da hain zuzen lehendakariak Euskadirentzat defendatzen duen eredua, elkarrizketan, negoziazioan, akordioan eta berrespenan oinarrituta.
Irailaren 18ko erreferendumari buruz, lehendakariak "garrantzizko" berri politikoa dela adierazi du, "albiste hona Europarentzat, izan ere egoera politiko berri bat eta aukera bat irekitzen ditu erreferendum horrek". Era berean, berretsi du Eusko Jaurlaritza Edinburgora bidaiatzen saiatuko dela erreferendumaren egunean.
Eusko Jaurlaritzaren Kontseiluak urte politiko berriko lehendabiziko bilkura egin du ostegunean. Martin Garitano Gipuzkoako ahaldun nagusiak, Juan Karlos Izagirre Donostiako alkateak eta Julio Astudillo Gipuzkoako Batzar Nagusietako bigarren presidenteorde eta jarduneko presidenteak hartu dituzte Iñigo Urkullu lehendakaria eta gainontzeko sailburuak.
Kontseilua amaitu ondoren izandako prentsaurrekoan, Urkulluk, Euzkadi Buru Batzar izan zena lehendakaria baino lehen, defendatu du EAJ-PNVren "zintzotasuna eta gardentasuna" batzokiak finantziatzeko orduan. Era berean, toki horiek "milaka afiliatu eta jarraitzaileen ahaleginari esker" existitzen direla ziurtatu du. Modu horretan, Euskadiko PPak abuztuan zehar 200 batzokien finantziazio irregularrari buruz egindako salaketei erantzun die.
EGONKORTASUNA, GOBERNAGARRITASUNA ETA ADOSTASUNA
Bestalde, lehendakariak komunikabideen aurrean esan du egonkortasuna, gobernagarritasuna eta adostasuna bultzatzea izango dela Eusko Jaurlaritzaren konpromiso instituzionala urte politiko berri honetarako ere, "krisialdian bost urte iragan ondoren hazkundea berreskuratzeko".
Ildo horretan, lehendakariak adierazi du, krisia bera oraindik gainditu ez bada ere, krisialdiaren gogorrena atzean utzi dela BPGa eta esportazioak (%5,4) hazi egin baitira 2014ko lehen seihilekoan. Era berean, iragarri du hazkundearen aurreikuspenak "gorantz berraztertzeko aukera izan daitekeela laster", nahiz eta "zuhurtziaz" jokatuko duela adierazi.
Lehendakariak baieztatu du "Ekonomia eta Enplegua Sustatzeko Programaren emaitzak ikus daitezkeela dagoeneko" eta azaldu du 2015eko aurrekontuek pertsonekiko, ekitatearekiko eta enpleguarekiko konpromiso sozialari eutsiko diotela. "Gobernuaren aurrekontuak zorroztasunean oinarrituko dira, daukana baino gehiago gastatu gabe", azaldu du Urkulluk.
Halaber, aldaketa eskatu du Europako politika ekonomikoan. Haren esanetan, "politika ekonomikoa zorroztasunak gidatu behar du, eta ez austeritateak", eta dei egin du Europa munduko ekonomiaren eragilea izan dadin berriz.
KONPROMISO POLITIKOA BAKEA ETA BIZIKIDETZAREKIKO
Bestalde, Urkullu lehendakariak alderdi politikoei eskatu die jarrera ausartagoa eta konpromiso politiko handiagoa izan ditzatela bakea eta bizikidetzarekiko, eta ekarpena egiteko eta aurrera egiteko tresna eta aukeratzat jo du Memoriaren eta Bizikidetzaren Institutua sortzeko Legebiltzarreko lantaldeak irailaren 5ean egingo duen bilera. Halaber, poztu egin da kale borrokari buruz uda honetan izan den istilu bakarrak inolako gizarte babesik izan ez duelako eta alderdi politiko guztiek berehala gaitzetsi dutelako.
Mariano Rajoy Espainiako Gobernuko presidentearekin izango duen bileraren inguruan, lehendakariak iragarri du Euskadiri dagozkion gaiak aztertuko dituela berarekin, eta Gernikako Estatutuarekiko duen betetze konpromisoari buruz galdetuko diola.
