BILBO, 20 Ene. (EUROPA PRESS) -
Patinen gaineko Hockeyko Kopa Kontinentala jokatu da urtarrilaren 26an Bilboko Casilla pabiloian, eta bertan, CERS Kopako txapeldun Coinasa Liceo H.C. eta Europako Ligako txapeldun F.C. Barcelona ariko dira nor baino nor.
Ekimena Bilbao Kirolak erakundeak eta Patinajeko Euskal Federazioak antolatu dute, kirol hau Bilbon sustatzeko helburuarekin. Horretarako, partidaren inguruko jarduerak antolatzeaz gainera, entrenatzaileentzako clinic bat, gazteentzako jarduerak, Bilboko patinaje eskolen gaineko informazio-banaketa eta patinen gaineko hockeyan hasteko materialaren zozketa bat antolatu dira. Norgehiagokak Patinajeko Euskal Federazioaren 25. urteurrena ospatzeko ere balioko du.
"Casilla pabiloia Euskadi mailan hockey partida bat izan duen edukiera handieneko instalazioa da, 5.000 eserlekurekin, eta orain dela 21 urte ez zen egiten. Bilbao Kirolak erakundetik kirol guztiak sustatzen ditugu, eta, horregatik, hain zuzen ere, ilusio handia egiten digu lehen mailako ekitaldi bat antolatzeak, hockeya bezain kirol dinamiko eta ikusgarri batekin", azaldu du aurkezpenean Jon Sustatxa Bilboko Udaleko Enplegu, Gazteria eta Kirol Saileko zinegotzi eta Bilbao Kirolak erakundeko presidenteak.
Partida urtarrilaren 26an izango da, arratsaldeko 20:00etan, Coinasa Liceo H.C. eta F.C. Barcelona taldeen artean. Sarrerak 3 euro balioko du, eta, gainera, ikastetxeetan 1.000 sarrera banatuko dira dohainik, gazteenen artean kirola sustatzeko helburuarekin. Partidaren aurretik, 17:30etatik 19:30etara, Patinen gaineko Hockey Entrenatzaile Elkartearen zuzendariorde Octavi Fontek clinic bat emango du beheragoko mailako entrenatzaileentzat.
Partidan bertan, patinaje eta hockeyko eskola ezberdinen gaineko informazioa banatuko da, eta hockeyan hasteko material-sorta batzuk zozkatuko dira.
