BILBO, 17 Mar. (EUROPA PRESS) -
Qatarko Al Sulaiman Travel bidaia-antolatzailea Euskal Autonomia Erkidegoa (EAE) bisitatzen ari da atzotik, bere turismo-eskaintzen katalogoan sartzeko helburuarekin. Turismo-agentzia arabiar baten bigarren bisitaldia da, Patxi Lopez Eusko Jaurlaritzako lehendakariak joan den urtarrilean egindako bidaiaren ondoren.
Izan ere, Eusko Jaurlaritzako Industria, Berrikuntza, Merkataritza eta Turismo Sailetik gogoratu dutenez, joan den otsailean Dubaiko Al Rais Holidays taldea izan zen EAEn, bertoko turismo-baliabideak ongi ezagutzeko eta etorkizunean bere bezeroei eskaintzeko.
Al Sulaiman bidaia-antolatzaile qatartarra berehala erantzun dio Eusko Jaurlaritzak egindako gonbidapenari, eta dagoeneko pentsatzen ari da EAE sartzea bere turismo-eskaintzen katalogoan. EAEn dauden bitartean, agentzia arabiarreko ordezkariek bertoko hotelik onenetako batzuk ezagutu dituzte, bai eta osperik handiena duten jatetxeak ere, Michelin izarrak dituzten batzuk barne.
Atzo hiri barneko ibilbide bat egin zuten Bilbon, Guggenheim Museoa eta Alondegia bisitatuz. Gaur, berriz, Gasteizen izango dira, eta arreta berezia eskainiko zaie Erdi Aroko hiriguneko ibilbideari eta Santa Maria Katedralari. Halaber, Urdaibaiko Biosferaren Erreserba ikusi ahal izango dute.
Bihar Donostiara joango dira, Kontxan barrena paseatzeko eta hainbat leku bisitatzeko (Aquariuma, adibidez), eta Zarautzera eta Getariara ere iritsiko dira. Ibilbidea amaitzeko, euskal kostaldeko beste herri batzuetan ibiliko dira, hala nola Hondarribian.
Bidaia-antolatzaile arabiarraren ordezkaritzako buru enpresako manager nagusi Joseph Anton Venisius da, eta erreserben arduradun Mohamed Samir Ahmed dago berarekin. Talde arabiarra gehien txunditzen ari diren turismo-baliabideen artean, hirigune historikoak eta merkataritza, museoak eta Qatarretik datozen familientzat opor-egonaldiak programatzeko EAEk eskaintzen dituen aukerak daude.
"Ahalegin handia egiten ari gara Euskadi eliteko turismorako lekua izan dadin. Izan ere, turismo mota hori ezin hobea da bost izarreko hoteletarako eta goi-mailako gastronomiarako, eta interes handia du gure hiriburuetako merkataritzan", ziurtatu du Eusko Jaurlaritzako Turismoko zuzendari Isabel Muelak.
Turismoko zuzendaria, gainera, apirilaren 16an Dubaira joatera gonbidatu dute, hain zuzen ere Al Rais Holidays taldeak Dubain dituen mila bezerorik onenei EAE turismo-jomuga gisa aurkezteko egingo den ekitaldira. Touroperadore horrek dagoeneko sartua du EAE Dubaiko bezeroentzat egiten duen turismo-eskaintzan.
Datozen asteetan, Patxi Lopez lehendakariak urtarrilean egindako bidaiaren ondorioz, inguru hartako hirugarren bidaia-antolatzaile bat iristea espero da.
