BILBO, 18 (EUROPA PRESS)
Salvatore Sciarrino egile italiarraren "Vanitas, naturaleza muerta para voz, piano y violonchelo" opera izango da datozen ostegun eta larunbatean, martxoaren 19an eta 21ean, Bilboko Arriagan. Bi emanaldiak 20:00etan hasiko dira, antzoki bilbotarreko arduradunek jakinarazi dutenez.
"Abangoardiako opera" edo "etiketa berezirik gabeko musika esperientzia" gisa katalogatu daitekeen lana da "Vanitas", eta Salvatore Sciarrino (Palermo, 1947), musika garaikideak duen izen garrantzitsuenetakoa.
"Vanitas" 1981eko abenduaren 11n Milanoko Piccola Scala antzokian estreinatu zen, eta Sciarrinok musika pentsatzeko duen modu bereziarekin bat datorren lana da. Egile italiarrak musika ulertzeko duen moduaren ezaugarri nagusia sonoritate isolatuen, teknika zabalduen eta isilune ugarien erabilera da. Horrela, "Vanitas", une batzuetan, soinuaren eta isiltasunaren arteko mugan dago, eta lehena, hitzez hitz, indarrez atera behar da bigarrenetik.
Operaren hiru interpreteek -Marisa Martins mezzosopranoak, Ricardo Bini pianistak (ikuskizunaren musika zuzendaria) eta Dragos Balan biolontxelo jotzaileak- protagonismoa partekatzen dute. Euren artean interpretazio joko bitxia sortzen da, hirurak "elkarrekin lehian" aritzen baitira, baina, aldi berean, elkar osatzen dute, musika espazioaren eta isiltasunaren bilaketan.
"'Vanitas' lanak, denboraren oroimenean ezkutatuta dauden eta une batean azaleratzeko eta berriro ere desagertzeko zain dauden oihartzun, aztarna, keinu, horietatik ibilbidea egiteko proposamena egiten du", azaldu dute Arriagako arduradunek.
"Apustu zuzena eta oso inguratzailea da", eta bere ezaugarriak direla eta, artistak eta ikus-entzuleak Arriagako eszenatokian elkartuko ditu. Horrela, ekitaldi horretarako, eszenatokia bera ikus-entzuleentzat prestatuta egongo da, operaz gertutik gozatzeko.
