BILBO, 28 (EUROPA PRESS)
Bilbao BBK Live jaialdiak beste bi talde gehitu dizkio uztailaren 7, 8 eta 9an Kobetamendin ospatuko den hamaikagarren edizioari: Tame Impala eta Jagwar Ma. Bi banda australiarrak, Arcade Fire, Pixies, Foals, New Order edo M83 moduko taldeei gehitu zaizkie egitarauan. Tame Imapala, gainera, jaialdiko egun bateko burua izango da Foals taldearekin batera, Last Tour antolatzaileak jakinarazi duenez.
"Extended Play" EParekin, Tame Impala taldeak Australiako publikoaren arreta bereganatzea lortu zuen, eta, The Black Keys eta MGMT banden gonbidatua izan zen Perth hiriko kontzertuetan. Alabaina, "Innerspeaker" lehen lan luzea izan zen australiarren izena nazioarteko mapan jarri zuena. 'Pitchfork', 'NME' edo 'Rolling Stone' argitalpenek, besteak beste, 2010eko diskorik onena zela esan zuten, eta geroago kaleratu dituzten bi diskoekin ere gauza bera gertatu da.
Hirugarren eta orain arteko azken diskoa, "Currents", iazko uztailean jarri zuten salgai, eta lan horri esker taldeak 2015eko musika zerrendetako lehenengo postuak okupatu ditu berriz ere. Mundu osoan agortu zaizkie sarrerak, eta Grammy sarietan izendatu dituzte bigarren aldiz, Disko Alternatiborik Onenaren kategorian.
Beste alde batetik, Jagwar Ma bandak The XX eta Foals taldeekin partekatu du agertokia eta, gaur egun, Tame Impalarekin batera bira egiten ari da Europan zehar. Arrakasta handia izan dute eta kontzertu askotan "sarrerak agortu dira" kartela eskegi behar izan dute. "Howlin" debutean ez dira falta rock, dance eta indie pop estiloak. Hurrengo diskoa udaberrian merkaturatuko dute, eta esku artean dutela iritsiko dira uztailean Bilbao BBK Live jaialdira.
Jagwar Ma taldearen lana ez da oharkabean geratu nazioarteko musika argitalpen nagusientzat. 2013an, 'NME' aldizkariak Oasis taldea agertokietara itzultzeko aukeratik ote zegoen galdetu zion Noel Gallagherri, eta zera erantzun zuen: "Oasiseko kideekin batzen naizenean, hain gaude lanpetuta Jagwar Ma taldeari buruz hitz egiten, ez dugula taldea berriz batzeko aukerari buruz hitz egiten".
