DONOSTIA, 29 (EUROPA PRESS)
Udalerri Euskaldunen Mankomunitateak (UEMA) legegintzaldi honetako lehen batzar orokorra egingo du datorren larunbatean, urriaren 3an, Azpeitian, eta lehendakari eta zuzendaritza batzorde berriak aukeratuko ditu.
Bere arduradunek gogorarazi dutenez, datorren urtean 25 urte beteko dituen erakunde publikoa da UEMA, eta 73 udalerri euskaldun biltzen ditu gaur egun, 200.000 lagunetik gorako lurraldea osatuz.
Horrela, legegintzaldi berriari hasiera emateko, ohi bezala, zuzendaritza batzorde berria eta pasa den legealdian lehendakari izan den Maren Belastegi ordezkatuko duen pertsona hautatuko dira larunbateko batzar nagusian, eta horiek izango dira UEMAren hurrengo lau urteotako jarduna gidatuko dutenak.
Batzar nagusia da UEMAren egituran organu gorena. Zuzendaritza Batzordea hautatzen du, eta erakundeak Aulestin, Azpeitian eta Oiartzunen dituen bulegoetan lan egiten duen lantalde teknikoa aritzen da gero zuzendaritzak erabakitako ildoak garatzen eta herriz herri eguneroko lana eta zerbitzuak bideratzen.
Modu honetan, UEMAren legegintzaldi honetako lehen batzar orokorra datorren larunbatean izango da, Azpeitiko San Agustin kultur gunean, eta 10:00etan hasiko da.
