DONOSTIA, 22 Mar. (EUROPA PRESS) -
Zientzia eta teknologia-dibulgazioko 2010eko CAF-Elhuyar sariak banatuko dira ostegun honetan Elhuyar Fundazioaren egoitza nagusian, Usurbilen (Gipuzkoa), arratsaldeko 18:00etatik aurrera, antolatzaileek jakinarazi dutenez.
Aurtengo edizioan, lau sari banatuko dira: Dibulgazio-artikulu orokorren saria (2.000 euro eta Imanol Andonegiren eskultura), Egilearen doktore-tesian oinarritutako dibulgazio-artikuluaren saria (2.000 euro eta Imanol Andonegiren eskultura), Zientzia-kazetaritzaren arloko saria (2.000 euro eta Imanol Andonegiren eskultura) eta Gazteei zuzendutako zientzia-narrazioaren saria (5.000 euro eta Imanol Andonegiren eskultura).
Lehiaketari dagozkion sariez gainera, Elhuyar Fundazioko Patronatuak erabaki du Jose Ramon Etxeberria Bilbaori Merezimenduko saria ematea zientzia eta teknologiaren kultura euskaraz hedatzeko egindako lanagatik.
2010eko CAF-Elhuyar sarietara orotara 48 lan aurkeztu dira, honela banatuta: Dibulgazio-artikulu orokorren kategoriara 27 lan aurkeztu dira; Egilearen doktore-tesian oinarritutako dibulgazio-artikuluen kategoriara sei lan aurkeztu dira; Zientzia-kazetaritzako 11 lan iritsi dira, eta Gazteei zuzendutako zientzia-narrazioen kategorian lau proiektu izan dira.
Bi epaimahai aritu dira lan guztiak epaitzen. Alde batetik, Gazteei zuzendutako zientzia-narrazioak kategoriara iritsiko lanak honako pertsona hauek epaitu dituzte: Yolanda Arrieta idazlea eta haur- eta gazte-literaturan aditua; Jesus Mari Olaizola "Txiliku", idazlea, Biologiako irakaslea eta haur- eta gazte-literaturan aditua, eta Josu Waliño, Elhuyar Fundazioko proiektuen kudeatzailea eta gazteentzako ipuinen idazlea.
Gainerako kategorietara iritsi diren lanak ebazteko, epamahai hau eratu da: Itziar Alkorta, Zuzenbide Zibileko irakaslea eta bioetikaria; Jose Maria Pitarke, CIC-NanoGUNEko zuzendaria; Juan Ignacio Pérez Iglesias, Kultura Zientifikoko EHU-BFA katedrako zuzendaria; Rosa Diez Urrestarazu, ETB1eko edukien zuzendaria; Txema Ramírez de la Piscina, Euskal Herriko Unibertsitateko Kazetaritzako irakaslea eta Jose Mari Rodriguez Ibabe, Elhuyar Fundazioko lehendakaria eta CEITeko ikertzailea.
