BILBO, 21 Nov. (EUROPA PRESS) -
Bilboko Udaleko Kultura eta Hezkuntza Sailak "Gizazine Crac XXI: Balioen krisitik ekonomia-krisira eta alderantziz" programa antolatu du asteazkenetik ostiralera San Frantzisko auzoko Udaltegian. Ekimenaren barruan film laburrak eta luzeak -dokumentalak eta fikziozkoak- eskainiko dira, egungo krisi ekonomikoaren ikuspegi desberdinetara hurbiltzeko asmoz. Programak Caostica elkartearen eta Zinebi Bilboko Zine Dokumental eta Film Laburren Nazioarteko Zinemaldiaren laguntza du.
Antolakuntzak adierazi duenez, Gizazine zikloaren bigarren edizioa Bilbo Zaharrera itzuliko da aurten, formatu berriarekin eta gaurkortasunezko gai baten inguruko egitarauarekin: egun jasaten ari garen krisia. Crac XXI azaroaren 23an, 24an eta 25ean egingo da San Frantziskoko Udaltegian, zinearen, performancearen eta Bizkaiko M-15 mugimenduarekin egingo den solasaldiaren bitartez gogoeta kritikoa proposatuz.
Programazioa asteazkenean hasiko da, Rodrigo Cortosen "Concursante" (2007) filmarekin, eta ondoren, A-Teatral taldearen "Imprevistos" performance ikuskizuna eszenaratuko da. Hurrengo egunean, ostegunean, Michael Winterbottom-en eta Mat Whitecross-en "La doctrina del shock" (2009) dokumentala eskainiko da, eta haren ondoren, mahai-inguru bat antolatuko da Bizkaiko "suminduen" taldearekin, "M-15 Bizkaia: jatorria, egungo egoera eta etorkizunerako planak" hitzaldiarekin.
Ostiralean amaituko da programa. ZinebiExpress lehiaketan saritutako film laburrak eman ondoren, DJ Mr. Chace-k eta VDJ Nauseas-ek musika saioa eskainiko dute. Ekitaldi guztietarako sarrera doakoa izango da.
