BILBO, 20 (EUROPA PRESS)
Zinegoak Bilboko Gaylesbotrans Nazioarteko Zinema eta Arte Eszenikoen Jaialdiak TransMex izeneko saila eskainiko dio Mexikoko transexualitateari. Roberto Castón jaialdiko programazio buruak azaldu duenez, "mexikar queer zine berriaren azpigenero ere dei diezaiokegunaren askotariko azken ekoizpenak" eskainiko dira sail horretan. Zinegoak otsailaren 22tik 29ra bitartean ospatuko da, eta fikziozko 12 film luze eta zazpi dokumental lehiatuko dira.
Guztira, TransMex sailak lau film luze eskainiko ditu -bi fikziozkoak eta bi dokumental- BilbaoArten, otsailaren 23tik 26ra bitartean, doako sarrerarekin. Sari ugari jaso dituen Rigoberto Perezcanoren "Carmin Tropical" nabarmendu du antolakuntza. Protagonista muxe bat d; muxea zapoteken kulturan kolonaurreko garaitik existitzen den figura da, eta emakume transgeneroei izena ematen die ofizialki.
Halaber, "Made in Bangkok" dokumentala ere aipatu dute antolatzaileek, Morganaren istorio harrigarria kontatzen duena: Morgana mezzosoprano mexikarra da, eta sexua berriz egokitzeko ebakuntza lortu nahian, Thailandiako edertasun lehiaketa bat irabaztea ikusten du aukera bakarra.
Gainera, dagoeneko ezagutzen dira jaialdiaren hasierako eta amaierako filmak. Hasierako galan, Stephen Dunn zuzendari gaztearen lehen lana den "Closer Monster" film kanadarraren nazioarteko estreinaldia izango da. Kanadako Film Onenaren Saria jaso zuen Torontoko zinenaldiaren azken edizioan, eta LGTB urteko bost film onenetakoen artean sailkatu du 'Vice' aldizkariak. Bere herritik alde egiteko irrikan dagoen gaztearen istorioa kontatzen du; erabat isolatuta sentitzen da herrian, eta bitartean, berak sortutako fantasiazko munduan bizitzea erabakitzen du.
Azkenik, jaialdiaren amaiera galan, Ventura Pons bartzelonarraren azken filma proiektatuko da: "El virus de la por" (Beldurraren Birusa). Josep María Miróren "Arkimedesen Printzipioa" antzezlanean oinarritzen da, eta igeriketa irakasle batek negarrez ari zen ume bati musu eman diolako sortzen den egoera kontatzen du. Ventura Ponsek Zinegoak jaialdiko Ohorezko Saria jaso zuen 2005ean eta lehiaketara dakarren bere hirugarren filma da hau, "Barcelona (un mapa)" eta "Ignasi M." lanen ondoren.
