Este venres terá lugar a primeira reunión para redactar o cronograma de actuacións, onde as máis "básicas" serán cimborrio e cubertas
SANTIAGO DE COMPOSTELA, 20 Nov. (EUROPA PRESS) -
O Goberno de España destinará un total de 17 millóns de euros ás obras de restauración e conservación da Catedral de Santiago incluídas no seu Plan Director, co obxectivo de frear a súa "deterioración galopante" e "relanzala" de cara ao próximo Ano Santo.
O presidente do Goberno, Mariano Rajoy, visitou este xoves Santiago de Compostela para asinar o protocolo de intencións que recollerá esta actuación, así como o compromiso da Xunta, o Concello e o Arcebispado de colaborar neste ámbito.
No acto de sinatura deste documento participaron o presidente da Xunta, Alberto Núñez Feijóo, o alcalde de Santiago, Agustín Hernández, e o deán da Catedral, Segundo Pérez, en representación do Arcebispado de Santiago. Así mesmo, asistiron, entre outras personalidades, a presidenta do Parlamento, Pilar Rojo, e o delegado do Goberno, Santiago Villanueva.
Este protocolo, que deberá concretarse en convenios futuros, pon a disposición da Fundación Catedral 17 millóns de euros que poderán utilizar ata o final da vixencia do Plan Director, no próximo Ano Santo 2021. Con este montante, sumado ás achegas xa realizadas por distintas entidades, a inversión nas actuacións recollidas no Plan Director da basílica superará os 25 millóns de euros, dos 30 que se consideraron inicialmente necesarios.
SINATURA DO PROTOCOLO
O presidente do Goberno recibiu á entrada do Pazo de Raxoi o saúdo dun pequeno grupo de turistas que se desprazara para ver a Catedral e que puideron departir un par de minutos con el e co presidente galego. Tras manter unha reunión duns 20 minutos nunha sala anexa, os representantes das institucións participantes asinaron o Protocolo de Intencións ante as autoridades congregadas.
O deán da Catedral, agradeceu ao Goberno central a "proximidade" e "sensibilidade" demostrada cara á Catedral no que cualificou dun "acto de valentía" tendo en conta a situación económica actual.
Ao mesmo tempo, fixo fincapé na necesidade de acometer obras de mellora na basílica de cara ao próximo Ano Santo e recordou a forma na que os peregrinos lle transmiten a súa "decepción" polo estado da Catedral, afectada por humedades e con "zonas sucias".
"RELANZAR" A CATEDRAL
Durante a súa intervención, o presidente do Goberno destacou o "compromiso" do Estado coa Catedral de Santiago, un dos "maiores tesouros de España" e confiou en que esta inversión permita "relanzala cara ao futuro".
"Este lugar, pola súa profunda vinculación coa historia de Galicia e de España confírmanos a todos na nosa condición de galegos e de españois", expresou Mariano Rajoy, que resaltou tamén a vinculación da basílica e o Camiño de Santiago con "esa casa común que é Europa".
Con esta inversión, garantiu Rajoy, o Goberno está a "render homenaxe aos ideais españois e europeos" e "preservando a súa vixencia para o presente e para o futuro", explicou.
De simboloxía tamén falou o presidente da Xunta, quen destacou que a Catedral di a sociedade que "os momentos de incerteza son superables cando o rumbo está claro". Por ese motivo, Núñez Feijóo instou á sociedade a, seguindo o exemplo dos construtores da Catedral, "non se render" e apostar por "políticas que unen" e ideais que "fan libre" ao ser humano.
Feijóo aproveitou a súa intervención para reivindicar o galleguismo de Mariano Rajoy, que apostou pola "conexión completa" da cornixa cantábrica e evidenciou un "compromiso certo, rotundo e irrevogable" coa alta velocidade, ao tempo que evitou "o rescate de España".
A inversión do Goberno central, garantiu Feijóo, permitirá situar á basílica compostelana "na elite das catedrais europeas", polo que agradeceu o xesto do Executivo español por facer "en época de vacas fracas o que se tería que facer" en épocas de abundancia".
O alcalde de Santiago considerou que esta inversión supón "unha das mellores noticias" para a cidade e recordou que a basílica necesita "unha intervención estrutural de gran calado" para evitar a "deterioración galopante" dos seus elementos.
Para Hernández, este protocolo permitirá levar a cabo "a maior actuación conxunta desenvolvida na Catedral dende que no século XVIII rematou a fachada" e confiou en que consiga "devolverlle o seu esplendor".
REUNIÓN ESTE VENRES
A Fundación Catedral manterá este venres a primeira reunión coa Dirección Xeral de Patrimonio para establecer as prioridades e actuacións que se levarán a cabo. A previsión do protocolo é que o diñeiro poida empregarse ata 2021, aínda que gastará o antes posible "se se pode facer o traballo con máis celeridade".
Así o sinalou, en declaracións aos medios, o director da Fundación Catedral, Daniel Lorenzo, quen sinalou que "o primeiro" que se fará tras a sinatura será "un cronograma".
Entre as actuacións "máis básicas" están aquelas que evitarán que as filtracións de auga sigan entrando na Catedral, como as do cimborrio, as capelas e as cubertas. No caso concreto do cimborrio, Lorenzo recordou que a actuación conta xa cun plan presentado pola Catedral ao Ministerio de Fomento.
Non obstante, Daniel Lorenzo recordou que as obras se levarán a cabo nun edificio que "está aberto e habitado", polo que será necesario pensar a "loxística" que permita compatibilizar os traballos coa actividade da Catedral e a orde na que deben abordarse para "non interferir" entre elas.
Con esta dotación e as recibidas anteriormente, "o máis crítico" na restauración da Catedral "quedará totalmente máis que superado", garantiu o director da Fundación. "Estamos a falar dunha inversión que permitirá avanzar dun xeito moi notable en todas as previsións do Plan Director", subliñou.
Así mesmo, recordou que os 30 millóns de euros recollidos no Plan Director "non abranguen só a basílica", senón tamén os edificios adxacentes nos que as intervencións, por agora, "son moi puntuais", e dotacións futuras para "prestar máis servizos" no futuro.
PLAN DIRECTOR
O Plan Director da Catedral de Santiago, asinado en 2009, estimaba unhas necesidades de 30 millóns de euros para as obras de restauración e conservación da basílica e os seus edificios anexos.
Nunha análise previa a partir de 25 áreas de estudio, os expertos detectaron 534 patoloxías que afectan á edificación, entre danos estruturais, afeccións da pedra, humedades, sucidade, carpintarías deterioradas ou elementos mal trazados, entre outros.
En función de prioridades e urxencias de actuación, o Plan Director organizou a raíz desta análise un programa de 89 intervencións, prioritarias, secundarias e de remate.
Polo momento, investíronse por parte das administracións preto de seis millóns de euros no edificio, entre os destinados á fachada e as torres e os orientados a traballos nas bóvedas interiores, a torre do reloxo ou no Pórtico. A maiores, a Catedral puxo en marcha o pasado ano un Programa de Mecenado para que empresas e particulares acheguen fondos ao seu Plan Director.
Adicionalmente, a Fundación Barrié mantén activo un programa para estudar, analizar e restaurar o Pórtico da Gloria, gravemente afectado polas humedades que entran na Catedral. Este plan, que iniciou este verán a súa fase de intervención directa tras os estudios previos, suporá unha inversión duns catro millóns de euros.
