av2" class="NormalTextoNoticia" itemprop="articleBody">
Arremeten contra os recortes, mentres que os pais de centros concertados piden máis concertos educativos
A CORUÑA, 31 Ago. (EUROPA PRESS) -
A presidenta da Confederación de Anpas de centros públicos (Confapa-Galicia), Helena Gómez, augura un inicio de curso "movido" e dá por feito a convocatoria de mobilizacións contra a Lei Orgánica de Mellora da Calidade Educativa (LOMCE), que acusa de "segregadora, sexista e de ideoloxía neoliberal".
En declaracións a Europa Press, Helena Gómez acusa á Xunta de aplicar a LOMCE con "improvisación". Mentres, a súa homóloga da Confederación Católica Galega de Anpas de Centros Concertados, María José Mansilla, admite que "quizais podería esperar un ano" para a súa aplicación.
"As cousas estanse a facer á présa e os profesores atópanse con que non saben que teñen que dar e o director non sabe qué atribucións vai ter", afirmou, en declaracións a Europa Press, Helena Gómez. En canto aos libros de texto, nos cursos nos que se implantará a lei, sinala que "varían moi pouco". "Máis na ideoloxía que no contido", sentencia.
Gómez remarca que o labor de Confapa se centrou en conseguir que os centros se comprometesen a non cambiar os libros de texto e destaca, en xeral, a boa resposta. Non obstante, precisa que o que piden aos profesores "é que elaboren material --sinala como a posibilidade de realizar fichas en primeiro de Primaria-- e que a Xunta lles incentiva niso", asegura.
LIBROS DIXITAIS
Pola contra, cuestiona a obriga de adquirir os libros dixitais, para complementalos cos impresos, cando os pais se acollan a opcións como o banco de empréstito de libros das Anpas, como acontecerá nalgúns centros en quinto e sexto de Primaria.
"Que teñan que pagar por baixalos por Internet, é un xeito de eludir o traballo por parte dalgúns profesores", sentenza. Ao fío diso, admite que tamén hai "claustros pouco solidarios que decidiron cambiar os libros e poñer libros LOMCE", engade.
SEGREGACIÓN POR SEXOS
Respecto ao ensino en España, subliña que "ninguén nega" o abandono escolar, "pero agora van tapalo coa FP básica", matiza. Desta, critica que se opte por esta vía en lugar de polo "reforzo" dos nenos con dificultades. En canto ás reválidas externas, insiste en que "é negarlle competencias aos profesores".
Por outra banda, afirma que o concerto con centros que segregan por sexo, ao amparo desta lei, é "a gota que enche o vaso". "Mentres se inviste diñeiro en colexios que segregan por sexo, na pública se recorta cada vez máis en profesores e se incrementa o ratio por alumno e aula", sinala como exemplos duns "recortes" que vai "gravísimos".
MATERIAL ESCOLAR
Ademais, critica que o cheque da Xunta, para as familias con menores ingresos, sexa este ano só para libros de texto e non poida adquirirse material escolar. "Moitas familias non van ter diñeiro para comprar o material", advirte.
Gómez reprocha tamén á Consellería de Educación "facer o que quixo" coa bolsa de comedores e reivindica o labor que están a facer as asociacións de pais e nais de alumnos nestes. "Funcionan mellor", sinala sobre prestacións como "o servizo madrugadores" ou a posibilidade de que os nenos poidan quedar ata máis tarde do horario escolar.
CONGAPA E A LOMCE
Pola súa banda, a presidenta da Confederación Católica Galega de Anpas de Centros Concertados (Congapa-Galicia), María José Mansilla, afirma, ao ser preguntada se comparte a afirmación de que hai "improvisación" na LOMCE que "en principio poderiamos dicir que si". Ao respecto, incide en que aos profesores "aínda non lles chegou o curriculum de Primaria e aos profesores cre que "quizais podía esperar un ano".
En canto ás posibles mobilizacións, considera que "todo o mundo ten dereito a manifestarse, pero ao final os prexudicados son os alumnos", matiza.
Non obstante, sobre a LOMCE, precisa que hai "aspectos mellorables". Ao fío diso, recoñece que "era necesaria unha reforma educativa", pero puntualiza que "que esta sexa a mellor, é difícil de valorar ata que unha lei non esta en marcha".
Desta, apunta, non obstante, que "non se garante de todo as prazas escolares en centros concertados e a igualdade de trato entre a rede pública e concertada", engade ao reclamar maior apoio para as bibliotecas escolares destes centros.
"IGUALDADE DE TRATO" COA PÚBLICA
Sobre os colexios concertados, insiste en que os pais que optan por eles "exercen un dereito e a Adminsitración cobre ese dereito". "É un diñeiro de todos", di sobre as achegas públicas a estes.
Na mesma liña, pronúnciase sobre o concerto cos centros que segregan por sexo. "A educación diferenciada como a mixta é unha opción pedagóxica, totalmente lexítima".
Respecto ás súas principais demandas, a presidenta de Confapa-Galicia subliña que "a cantidade que por concerto se dá aos centros cada vez foi a menos" e defende "un incremento dos concertos educativos".
Tamén reivindica "igualdade de trato" entre a rede pública e concertada. Como exemplo, cita os comedores escolares. "Non temos acceso ás axudas que teñen as Anpas de centros públicos", apostila Mansilla.
