OURENSE, 21 Dic. (EUROPA PRESS) -
O corpo sen vida dun home foi localizado na mañá deste domingo no encoro de Albarellos, en Boborás (Ourense), polos efectivos do Grupo de Especial de Actividades Subacuáticas (GEAS) que participaban no dispositivo de busca iniciado o sábado despois de que uns cazadores avistasen o cadáver.
Segundo explicaron a Europa Press fontes do Grupo de Emerxencias supramunicipal (GES) de Ribadavia, o corpo foi localizado sobre as 12,00 horas na zona de desembocadura dun das canles que vai dar a este encoro, ás pés das comportas, a onde foi parar tras ser avistado na canle do río Vaiño.
As mesmas fontes explicaron que a empresa xestora, Fenosa, cortou a corrente da auga que transcorre pola canle na que foi avistado o corpo, cuestión que posibilitou que baixase a canle e facilitou os labores de busca. Con todo, os traballos foron "difíciles" xa que o cadáver estaba mergullado.
Polo momento descoñécese a identidade do corpo localizado, que corresponde a un home de entre uns 40 e 50 anos e que será estudado polo médico forense e a policía xudicial, que ás 14,00 aínda non chegaran ao lugar.
SEN CONSTANCIA DE DESAPARICIÓNS NA ZONA
Pola súa banda, fontes da Garda Civil confirmaron a Europa Press que "non hai constancia" de que desaparecese algún veciño na zona nas últimas horas, posto que non recibiron ningunha denuncia ao respecto.
No operativo de busca posto en marcha o sábado participou a Garda Civil, os GEAS, o GES de Rivadavia, Avión e Protección Civil de O Carballiño.
