SANTIAGO DE COMPOSTELA, 23 Oct. (EUROPA PRESS) -
O Goberno galego aprobou para remitir ao Parlamento o proxecto de Lei de Garantía de Calidade dos Servizos Públicos que, entre outras cuestións, permitirá penalizar empresas concesionarias da Xunta que non cumpran cos estándares de calidade fixados nos pregos de contratación. Ademais, este "incumprimento" dificultará o seu acceso a posteriores contratos.
Ao termo do Consello da Xunta, o presidente, Alberto Núñez Feijóo, concretou que esta norma se aplicará aos contratos financiados con fondos públicos, ao igual que aos servizos prestados por empregados públicos que dependen directamente da Administración autonómica. A súa calidade será controlada e os resultados da análise publicados nun barómetro anual.
Feijóo tamén destacou que a lei outorga "un papel activo ao cidadán" e "eleva a rango de lei" o dereito a "presentar suxestións ou queixas". Tamén quedará "garantido" que os galegos que formulen este tipo de cuestións críticas coa calidade dalgún servizo sexan informados "sobre a súa resolución".
(HABERÁ AMPLIACIÓN)
