SANTIAGO DE COMPOSTELA/FERROL, 3 Ago. (EUROPA PRESS) -
O buque-cisterna 'Granato', con bandeira italiana e fondeado en corentena dende o sábado na Ría de Ares, atracou este luns no Porto Exterior de Ferrol para permitir o acceso un equipo de médicos de Sanidade Exterior, dependentes do Ministerio de Sanidade, que se desprazaron dende a cidade da Coruña para realizar unha revisión do estado de saúde da tripulación.
Ás 6,30 horas deste luns, o navío iniciou a súa manobra de abandono do lugar de fondeo, na Ría de Ares, para dirixirse ao porto de Caneliñas, onde os remolcadores 'Ibaizabal Cinco' e o 'Hocho' para colaborar nas tarefas de remolque, chegando ao porto Exterior sobre as 8,00 horas.
O 'Granato' permanece fondeado en corentena dende última hora da tarde do pasado sábado despois de que a autoridade xudicial lle impedise o seu acceso aos peiraos de Forestal do Atlántico, unha empresa situada en Mugardos, a raíz do falecemento dun dos seus tripulantes, en augas próximas a Vigo.
Polo momento descoñécense os resultados das probas practicadas ao mariñeiro falecido, realizados por efectivos do Instituto de Medicina Legal de Galicia (Imelga), aínda que as primeiras informacións apuntan a que a morte do tripulante, de nacionalidade india, se produciría por unha enfermidade contaxiosa.
Á espera do resultado das análises do falecido que se realiza nestes momentos, Sanidade Exterior levará a cabo unha inspección rutineira da embarcación (prevista sobre as 10,00 horas) e realizará unha valoración, cos datos dispoñibles, do estado de saúde da tripulación e procedendo, no seu caso, á expedición da libre plática que permitirá ao buque realizar os seus labores de carga e descarga con normalidade.
No 'Granato' atópanse 14 tripulantes, dos cales seis son de nacionalidade india, catro filipinos, tres italianos e un romanés e segundo a declaración transmitida dende o buque ningún presenta síntomas de enfermidade. Nas últimas horas non se permitiu nin a entrada nin a saída do buque-cisterna, custodiado por efectivos da Garda Civil do Mar.
